އިޖުތިމާއީ އަދި ދީނީ ކަރަކާތްތައް ހިންގާ ޖަމިއްޔާތަކަށް މާލީ އެހީ އާއި އަދި އެހެނިހެން އެހީ ވެސް ދޭން ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިއަދު ދީނީ އިޖްތިމާއީ މަސައްކަތްކުރާ ޖަމިއްޔާތަކުގެ އަހަރީ ބައްދަލުވުމުގައި މިނިސްޓަރު ވިދާޅުވީ ރާއްޖޭގައި ދީނީ ގޮތުން ވަރަށް ހިދުމަތްތެރި ޖަމިއްޔާތައް އެބަހުރި ކަމަށާއި އެކިއެކި ޖަމިއްޔާތަކުން އެހީތެރިކަން ހޯދަން މިނިސްޓްރީގައި އަބަދު ވެސް އެދެމުން އަންނަ ކަމަށެވެ.
"ބައެއް ފަހަރު ޖަމިއްޔާތަކުގެ ޕްރޮޕޯސަލް އާދޭ އެކިއެކި ވަސީލަތްތައް ހޯދަން، ދީނީ ދަރުސްތައް ބޭއްވުމަށް ކެމެރާ ހޯދުމަށް ނޫނީ އެހެންވެސް ބައެއް ވަސީލަތްތައް ހޯދަން،" ޝަހީމު ވިދާޅުވި އެވެ. "ﷲ އިރާދަކުރެއްވިއްޔާ އަޅުގަނޑުމެންނަށް އެފަދަ ކަންކަން ކުރެވޭނެ."
އޭނަ ވިދާޅުވީ ޖަމިއްޔާތަކުން ހިންގާ ދީނީ ހަރަކާތްތަކަށް ބޭނުންވާ އެހީތެރިކަން ފޯރުކޮށް ދިނުމަށް ބޭނުންވާ އިންތިޒާމްތައް މިއަދު ފެށި މަހާސިންތާ ނިމިގެން ދާއިރު ހަމަޖެހިގެން ދާނެ ކަމަށެވެ. އަދި އެ އިންތިޒާމުތައް ހަމަޖެހިގެން ދާނީ ވަރަށް ފުރިހަމައަށް ކަމަށާއި، މިކަމަކީ ދެމިގެން ދާނެ ކަމަކަށް ވާނެ ކަމަށް މިނިސްޓަރު ވިދާޅުވި އެވެ.
"ކުރިއަށް އޮތް ތަނުގައި އެކިއެކި ޖަމިއްޔާތަކުން ކުރާ މަސައްކަތްތަކަށް މާލީ ގޮތުން ވެސް އެހީތެރިކަން ދެވެން އޮތް މިންވަރަކުން މިނިސްޓްރީގެ ފަރާތުން އެހީތެރިވާނެ ކަމުގެ ޔަގީންކަން އަޅުގަނޑު އަރުވަން." ޝަހީމް ވިދާޅުވި އެވެ.
ޖަމިއްޔާތަކުގެ މަހާސިންތާގައި ރާއްޖޭގެ 66 ދީނީ ޖަމިއްޔާއަކުން ބައިވެރިވެ އެވެ.