ނެޓްފްލިކްސް އިން މީގެ ތިން އަހަރު ކުރިން ގެނެސްދިން ދެކުނު ކޮރެއާގެ މަގުބޫލު ސީރީޒް "ސްކްއިޑް ގޭމް" އަކީ ބޮލީވުޑްގެ ފިލްމެއް ކޮޕީކޮށްގެން ހަދާފައިވާ އެއްޗެއް ކަމަށް ބުނެ ދައުވާކޮށްފި އެވެ.
އެ ދައުވާކުރީ 2009 ގެ އެކްޝަން ތުރިލާ "ލަކް" ގެނެސްދިން ޑައިރެކްޓަރު ސޯހަމް ޝާހެވެ. އޭނަ ބުނީ 2021 ގައި ނުވަ އެޕިސޯޑާ އެކު ގެނެސްދިން "ސްކްއިޑް ގޭމް" އަކީ އޭނަގެ "ލަކް" ގެ މައިގަނޑު ޕްލޮޓާއި އޭގެ ކެރެކްޓާތައް ކޮޕީކޮށްގެން ހަދާފައިވާ އެއްޗެއް ކަމަށެވެ.
"ލަކް" އަކީ ކުރީގެ އެކްޓަރު އިމްރާން ޚާނާއި ޝްރޫތީ ހަސަންގެ އިތުރުން ސަންޖޭ ދަތު މައިގަނޑު ރޯލުތައް ކުޅުނު ފިލްމެކެވެ. އޭގައި ދައްކުވައި ދެނީ ނުރައްކާތެރި ކަންކަމާ ކުރިމަތިލައިގެން ފައިސާ ހޯދާނެ ގޮތެވެ.
ސަވައިވަލް ތުރިލާއެއްގެ ގޮތުގައި ގެނެސްދިން "ސްކްއިޑް ގޭމް" ގެ މައިގަނޑު ޕްލޮޓް އެނބުރެނީ ވެސް ހަމަ މިކަހަލަ ގޮތަކަށެވެ. އެހެންވެ މިކަމާ ގުޅިގެން ސޯހަމް ބުނީ އެ ސީރީޒަކީ އޭނަ 2006 ގައި ލިޔެ، 2009 ގައި ގެނެސްދިން ފިލްމު ކޮޕީކޮށްގެން ހަދާފައިވާ އެއްޗެއް ކަމަށާއި އެއީ ފިކުރީ މުދަލަކަށް އަރައިގަތުން ކަމަށެވެ.
މިކަމާ ގުޅިގެން ސޯހަމް ނެޓްފްލިކްސް އާއި "ސްކްއިޑް ގޭމް" ގެ ޑައިރެކްޓަރަށް ކުރި ދައުއާވާ ގުޅިގެން ނެޓްފްލިކްސް އިން ވަނީ މިހާރު މިކަމަށް ރައްދު ވެސް ދީފަ އެވެ. ދުނިޔޭގެ އެންމެ ބޮޑު ސްޓްރީމިން ޕްލެޓްފޯމުން ބުނީ ސޯހަމްގެ ދައުވާގައި އެއްވެސް އަސާސެއް ނެތް ކަމަށާއި "ސްކްއިޑް ގޭމް" އަކީ ސީދާ ޑައިރެކްޓަރު ވަންގް ޑޮންގް-ހީކްގެ އޮރިޖިނަލް އުފެއްދުމެއް ކަމަށެވެ.
އެހެންވެ ސޯހަމް ކުރާ ދައުވާ އން ދިފާއުވެވޭނެކަމުގެ ފުރިހަމަ ޔަގީންކަން ވެސް އޮތް ކަމަށް ނެޓްފްލިކްސްގެ ތަރުޖަމާނު ވިދާޅުވި އެވެ.
މި ރައްދާ ގުޅިގެން ސޯހަމް އިތުރު އެއްޗެއް އަދި ބުނެފައެއް ނުވެ އެވެ. އޭނަ އަކީ 2005 ގެ "ކާލް" އާއި 2019 ގެ "ފިކްޒާ" ގެ އިތުރުން މި އަހަރު "ކަރްތަމް ބުގްތަމް" ވެސް ގެނެސްދިން ޑައިރެކްޓަރެވެ.
"ސްކައިޑް ގޭމްސް" އަށް ލިބުނު ބޮޑު ތަރުހީބާ ގުޅިގެން މީގެ ދެވަނަ ސީޒަނެއް ވެސް މިހާރު އޮތީ ގެނެސްދިނުގެ މަގުމަތީގަ އެވެ. އެއީ ޑިސެމްބަރު 26 ގަ އެވެ. އަދި މީގެ ތިން ވަނަ ސީޒަނެއް ވެސް ހަދާނެކަން އޮތީ އިއުލާންކޮށްފަ އެވެ.