ފިރިމީހާ ފެންނުވަރައި ނުތާހިރުކޮށް އުޅޭތީ އިންޑިއާގެ އާގްރާގެ މީހަކު ވަރިވާން މައްސަލަ ކޯޓަށް ހުށަހަޅައިފި އެވެ.
މީޑިއާތަކުން ބުނީ މީގެ ދޮޅު މަހެއްހާ ދުވަސް ކުރިން ކުރި ކައިވެންޏަށް ފަހު، ފިރިމީހާ ފެންނުވަރައި މުޑުދާރުކޮށް އުޅޭތީ އަންހެން މީހާ އެކަމާ އުނދަގޫވެގެން ވަރިވާން ނިންމައި، ފިރިމީހާއާ ދެބަސްވެ ގެއިން ވެސް ނުކުމެގެން ގޮސްފައިވާ ކަމަށެވެ.
އަންހެން މީހާއާ ހަވާލާދީ "އިންޑިއާ ޓުޑޭ" އިން ބުނެފައިވާ ގޮތުގައި ކައިވެންޏަށް 40 ދުވަސްވީ އިރު، ފިރިމީހާ ގަވައިދަކުން އެއްވެސް ދުވަހަކު ފެނެއް ނުވަރަ އެވެ. އަދި ކައިވެނި ކުރި ފަހުން އޭނަ ފެންވެރީ އެންމެ ހަ ދުވަހު ކަމަށާއި އޭގެ ސަބަބުން ދުވާ ނުބައި ވަހުން ފިރިމީހާ އެކީ އުޅެން ކެތްނުވާނެ ކަމަށް އަންހެން މީހާ ބުނެފައިވެ އެވެ.
އަންހެން މީހާ ބުނެފައިވާ ގޮތުގައި ވަނީ ފިރިމީހާ ފެންވަރާ އިރު ވެސް ހަމައެކަނި ގަޔަށް ބުރުއްސާލަނީ ކަމަށާއި އެކަމަށް ބޭނުން ކުރަނީ ގަންގާ ކޯރުން ގެންނަ ފެން ކަމަށެވެ.
މި މައްސަލައިގައި އަންހެން މީހާ ގެއިން ނުކުމެގެން އޭނަގެ މައިންފަބައިންގެ ގާތަށް ގޮސްފައިވާ އިރު، އާއިލާ އިން ވެސް ބޭނުން ވަނީ އެ ކައިވެނީ ރޫޅާލަން ކަމަށް މީޑިއާތަކުން ބުންޏެވެ.