މަސްތުވާތަކެއްޗާ ދެކޮޅަށް ނ. އަތޮޅުގައި ހާއްސަ މަސައްކަތްތަކެއް ފަށައިފި އެވެ.
މި މަސައްކަތް ކުރިއަށް ގެންދަނީ ނ. އަތޮޅު ކައުންސިލާއި ނެޝަނަލް ޑްރަގް އެޖެންސީ އެންޑީއޭ) ގުޅިގެންނެވެ. އެގޮތުން ދެ ފަރާތުން ވަނީ ގުޅިގެން މަސައްކަތް ކުރަން މި މަހުގެ 12 ގައި އެއްބަސްވުމެއްގައި ވެސް ސޮއި ވެސް ކޮށްފަ އެވެ. އެންޑީއޭގެ ފަރާތުން ސޮއިކުރެއްވީ ސީއީއޯގެ މަސްޢޫލިއްޔާތާ ވަގުތީ ގޮތުން ހަވާލުވެ ހުންނެވި ހޯމް މިނިސްޓްރީގެގެ ނައިބު މުޙައްމަދު ރާޝިދު އެވެ. ކައުންސިލްގެ ފަރާތުން ސޮއިކުރެއްވީ ރައީސް މުޙައްމަދު ބަޝީރު އެވެ.
މި އެއްބަސްވުމުގެ ދަށުން ނ.އަތޮޅުގައި މަސްތުވާތަކެތި ބޭނުންކުރާ މީހުން މަދުކުރުމާއި، އެ މީހުންނަށް ބޭނުންވާ ފަރުވާ އާއި އަޅާލުން ފޯރުކޮށްދީ، ފައިދާހުރި ބައެއްގެ ގޮތުގައި މުޖުތަމަޢުއާ ގުޅުވައިދިނުމަށް މަސައްކަތް ކުރާނެ އެވެ.
ނ. އަތޮޅުގައި މަސްތުވާތަކެތީގެ މައްސަލަ އޮތް މިންވަރު ދެނެގަތުމާއި، މަސްތުވާތަކެތިން ރައްކާތެރިކުރުމާއި އަދި ފަރުވާ ބޭނުންވާ ފަރާތްތަކަށް ދޭން އެންމެ އެކަށީގެންވާ ފަރުވާގެ ބާވަތްތައް ދެނެގަތުމަށް މަޢުލޫމާތުތައް ނީޑް އެންޑް ރެޑިނަސް އެސެސްމަންޓްގެ ޒަރީއާއިން އެއްކުރަން ވެސް ނިންމާފައުވެ އެވެ.
އެއްބަސްވުމުގައި ހިމެނޭ މައިގަނޑު ކަންކަން:
* ޕްރޮގްރާމް ފެށުމަށް ހެދޭ ނީޑްސް އެންޑް ރެޑިނަސް އެސެސްމަންޓްތަކުގެ ނަތީޖާތަކަށް ބިނާކޮށް އަތޮޅުގެ އެކި ރަށްތަކަށް ފަރުމާކުރެވިފައިވާ ޚިދުމަތްތައް އެކުލަވާލައި ހަ މަސް ދުވަހުގެ ޕައިލެޓް ޕްރޮގްރާމެއް ކަނޑައެޅޭ ރަށެއްގައި ހިންގުން
* މަސްތުވާތަކެތީގެ މައްސަލަ ހުރި ފަރާތްތަކުން ފަރުވާގެ ޚިދުމަތަށް އެޕްލިކޭޝަން، ރެޖިސްޓްރޭޝަން، އެސެސްމަންޓް އަދި އެހެނިހެން) ހުށައަޅާނެ ނިޒާމެއް ޤާއިމްކުރުން
* ފަރުވާ ނަގަމުންދާ ފަރާތްތަކަށް ބޭނުންވާ ޞިއްޙީ ޖިސްމާނީ އަދި ނަފްސާނީ އެހީތެރިކަން އެއިދާރާއެއްގައި ހުރި ޚިދުމަތް ދިނުމުގެ ޤާބިލުކަމަށް ރިޢާޔަތްކޮށް ފޯރުކޮށް ދިނުންވެ.
* ޕްރޮގްރާމްގައި ހިލޭ ސާބަހަށް މަސައްކަތްކޮށް ދޭނެ ފަރާތްތަކުގެ ތެރެއިން އިސްކޮށް ހަރަކާތްތެރިވާނެ ޓީމެއް އެކުލަވާލާ ތަމްރީނުކުރުން
* ޕްރޮގްރާމުގައި މަސައްކަތްކުރާ ފަރާތްތަކަށް ބޭނުންވާ ފަންނީ ޤާބިލުކަން އިތުރުކުރުމަށް ބޭނުންވާ އެހީތެރިކަން ފޯރުކޮށް ދިނުން * ވަށައިޖެހޭ ފަރުވާގެ ނިޒާމެއްގެ ތެރެއިން މަސްތުވާތަކެތި ބޭނުންކުރާ ފަރާތްތަކަށް ބޭނުންވާ އެހީތެރިކަން ފޯރުކޮށް ދިނުމާއި އަނބުރާ މުޖުތަމަޢުއަށް ފައިދާކޮށްދޭ ބައެއްގެ ގޮތުގައި ގުޅުވައި ދިނުން
* ޕްރޮގްރާމް ހިންގުމަށް ދިމާވާ ގޮންޖެހުންތަކާއި ހުރަސްތައް ދެނެގަނެ އެކަމުގެ ހައްލު ހޯދުމަށް ދެ ފަރާތުންވެސް ކަމާ ބެހޭ ފަރާތްތަކާއެކު މަސައްކަތް ކުރުން
ޕްރޮގްރާމްގެ މޮނިޓަރިން އެންޑް އިވެލުއޭޝަން:
ފޯރުކޮށްދޭ ޚިދުމަތްތަކުގެ ފައިދާ އާއި އަސަރު ވަޒަންކުރުމަށްޓަކައި މޮނިޓަރިން އެންޑް އިވެލުއޭޝަން ފްރޭމްވޯކެއް އެކުލަވާލައި ތަންފީޒު ވެސް ކުރަން ޖެހެ އެވެ. އަދި ޚިދުމަތުގެ މަޤްޞަދުތައް ޙާސިލްކޮށްދީ، ރަނގަޅުވަމުން އަންނަ ފަރުދުންގެ ދިރިއުޅުމަށް ހެޔޮ އަސަރުތަކެއް ކުރަމުންދާކަން ކަށަވަރުކުރުމަށް ޤަވާއިދުން މޮނިޓަރިން އަދި އިވެލުއޭޝަން ހަރަކާތްތައް ހިންގަން ޖެހޭނެ އެވެ.
އަދި މަސްތުވާތަކެތި ބޭނުންކުރާ ފަރާތްތަކަށް ދެވޭ ޚިދުމަތްތައް ދިނުމުގެ މަސައްކަތް ކަނޑައަޅާ އުސޫލެއްގެ މަތިން ބަަލަހައްޓަން ވެސް ޖެހޭނެ އެވެ. ޕްރޮގްރާމްގެ މޮނިޓަރިން އަދި އިވެލުއޭޝަންގެ ކަންތައްތައް އެންޑީއޭއިންނެވެ.