ލަންކާގެ ރިޔާސީ އިންތިހާބު ކުޑަތަންވެފައި ވަނިކޮށް އެ އިންތިހާބުގައި ވާދަކުރައްވާ މިހާރުގެ ރައީސް ރަނިލް ވިކްރަމަސިންހަ ރިޔާސީ ރޭހުން ވަކިވެވަޑައިގަންނަވަން އުޅޭ ވާހަކަ ދޮގުކުރައްވައިފި އެވެ.
ކެންޑީގައި އިއްޔެ އޮތް ކެމްޕޭން ރެލީއެއްގައި އޭނަ ވިދާޅުވީ އަސްލެއް ނެތް އެ ވާހަކަ ފަތުރަނީ ސަމާގީ ޖަނާ ބަލަވެގަޔާ (އެސްޖޭބީ) ޕާޓީން ކަމަށެވެ.
"އެކަމަކު އެ މީހުންނަށް އެނގެން ވާނެ އަހަންނަކީ އެއްވެސް އިރެއްގައި ކަންކަމުގައި ފަހަތަށް ޖެހޭ މީހެއް ނޫންކަން،" ރަނިލް ވިދާޅުވި އެވެ. "އެހެންވީމަ އަހަރެން އަނބުރާ ނަން ނަގަން އުޅޭ ކަމަށް ބުނެ ފަތުރާ ވާހަކަތަކުގައި އެއްވެސް އަސްލެއް ނެތް."
ރަނިލް ވަނީ އޭނަގެ ޕާޓީ، ޔުނައިޓެޑް ނެޝަނަލް ޕާޓީ (ޔޫއެންޕީ) އިން ވަކިވެ އެސްޖީބީއާ ގުޅުނު މެންބަރުން އަލުން ޕާޓީއާ ގުޅުމަށް ވެސް ދައުވަތު ދެއްވައިފަ އެވެ. އަދި އންތިހާބު ކާމިޔާބުވާނެކަމުގެ ޔަގީންކަން ވެސް އޮތް ކަމަށް ވިދާޅުވި އެވެ.
ދާދި ފަހުން އާންމު ފަރާތަކުން ރަނިލްގެ ކެންޑިޑޭސީ ބާތިލުކޮށް ދޭން އެދި ސުޕްރީމް ކޯޓަށް ވެސް ހުށަހެޅި އެވެ. ނަމަވެސް އެ މައްސަލަ ކޯޓުން ވަނީ ބޭރުކޮށްފަ އެވެ.
ލަންކާގެ ރިޔާސީ އިންތިހާބު އޮންނާނީ މި މަހުގެ 21 ގަ އެވެ. އިންތިހާބުގައި 38 ކެންޑިޑޭޓަކު ވާދަކުރައްވަ އެވެ.
ރަނިލް އަކީ މި އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން ސިޔާސީ ގޮތުން އެންމެ ތަޖުރިބާ ހުންނެވި ކެންޑިޑޭޓެވެ. ލަންކާގެ އެންމެ ނުފޫޒު ގަދަ ސިޔާސީ ލީޑަރުންގެ ތެރޭގައި ހިމެނިވަޑައިގަންނަވާ ރަނިލް ލަންކާގެ ރައީސް ކަމަށް އައްޔަންކުރީ 2022 ގަ އެވެ. އެއީ ކުރިން އެ މަގާމުގައި ހުންނެވި ގޮޓަބަޔާ ރާޖަޕަކްސާ ޕްރެޝަރުތަކާ ހެދި އިސްތިއުފާ ދެއްވުމާ ގުޅިގެންނެވެ.
މިހާރު އުމުރުން 75 އަހަރުގެ ރަނިލް އަކީ ލަންކާގެ ބޮޑުވަޒީރުކަން ހަ ފަހަރެއްގެ މަތިން ކުރައްވާފައިވާ ބޭފުޅެކެވެ.
އޭނަ ކުރިން ޑިފެންސް މިނިސްޓަރުކަމާއި ފިނޭންސް މިނިސްޓަރުކަމާއި ޓެކްނޮލޮޖީ މިނިސްޓަރުކަމުގެ އިތުރުން ސޯޝަލް އެމްޕަވަމަންޓް މިނިސްޓަރު ވެސް ކުރެއްވި އެވެ.