އިންޑިއާގެ ފިލްމީ ތަރިން ކަމަށްވާ އަދިތީ ރާއޯ ހައިދަރީ އާއި ސިދާތު މިއަދު ކައިވެނިކޮށްފި އެވެ.
އެ މީހުންގެ ކައިވެނީގެ ހަފުލާގެ ފޮޓޯތަކެއް ސޯޝަލް މިޑިއާގައި ވެސް ޕޯސްޓްކޮށްފައިވެ އެވެ. ވަރަށް ގިނަ ފޭނުންނާއި ފިލްމީ ދާއިރާގެ ގިނަ ބަޔަކު މިހާރު އަންނަނީ ދެމަފިރިންނަށް މަރުހަބާ ކިޔަމުންނެވެ.
އަދިތީ އާއި ސިދާތު އެންގޭޖްވީ މި އަހަރުގެ މާޗް މަހުގެ ފަހުކޮޅު އެވެ. އެ ދެ މީހުން މިއަދު ކައިވެނިކުރީ ރައްޓެހިވެގެން އުޅޭތާ މިހާރު ތިން ވަރަކަށް އަހަރު ފަހުންނެވެ.
އަދިތީ އާއި ސިދާތު 2021 ގައި އެކީގައި ފިލްމެއް ވެސް ކުޅުނެވެ. އެއީ ތެލެގޫ ފިލްމު "މަހާ ސަމޫދަރަމް" އެވެ. އަދިތީ އާއި ސިދާތަކީ ވެސް ބޮލީވުޑާއި އިންޑިއާގެ ދެކުނު ފިލްމުތަކުގައި މަސައްކަތްކުރާ ދެ ތަރިންނެވެ. އަދިތީގެ އެންމެ ފާހަގަކޮށްލެވޭ ޕްރޮޖެކްޓަކީ ސަންޖޭ ލީލާ ބަންސާލީގެ ސީރީޒް "ހީރާމަންޑީ" އެވެ. އޭނަ ކުޅުނު ފިލްމުތަކުގެ ތެރޭގައި "ދިއްލީ 6"، "ރޮކްސްޓާ"، "ލަންޑަން، ޕެރިސް، ނިއު ޔޯކް"، "ފިތޫރު" އަދި "ވަޒީރު" ފަދަ އެތައް ފިލްމެއް ހިމެނެ އެވެ.
ސިދާތު ކުޅުނު އެންމެ ފާހަގަކޮށްލެވޭ ހިންދީ ފިލްމަކީ އާމިރު ޚާންގެ "ރަންގް ދެ ބަސަންތީ" އެވެ.
އަދިތީ، 37، އާއި ސިދާތު، 45، އަކީ ކުރީގެ ކައިވެނިތައް ރޫޅިފައިވާ ދެ ޔަރިންނެވެ. އަދިތީ އާއި ސަތިއަދީޕް މިޝްރާގެ ކައިވެނި ރޫޅުނީ 2012 ގަ އެވެ. ސިދާތު އާއި މެގްނާގެ 2003 ގެ ކައިވެނި ރޫޅުނީ 2007 ގަ އެވެ.