ކުންފުނިތަކުގެ ބޯޑުން ސީއީއޯއިންނާއި ޑިރެކްޓަރުން އިސްތިއުފާދޭ ވާހަކަ ސަރުކާރަށް ނިސްބަތްވާ ބޭފުޅުން ދައްކަވާކަމަށާއި އެހެންނަމަވެސް އެ ބޭފުޅުން އިސްތިއުފާ ދެއްވަނީ އެކަމަށް މަޖުބޫރު ކުރުވުމުން ކަމަށް އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާ އިބްރާހިމް ނާޒިލް ތުހުމަތު ކުރައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ސަރުކާރުގެ ފަރާތުން ކުންފުނީގެ ޤާނޫނަށް ހުށަހަޅާފައިވާ އިސްލާހަށް ވާހަކަ ދައްކަވަމުން ނާޒިލް ވިދާޅުވީ ޤާނޫނު މިހާރު އޮތްގޮތުންވެސް ކުންފުންޏެއްގެ ހާއްސަ އާންމު ޖަލްސާ އަވަހަށް ބޭއްވޭނެ ކަމަށެވެ.
މި ޤާނޫނަށް ހުށަހަޅާފައިވާ އިސްލާހަށް ބައެއް މެންބަރުން ވާހަކަ ދެއްކެވިއިރު ބީއެމްއެލްގެ ވާހަކައަށް އަލިއަޅުވާލާ އެކުންފުނީގެ ސީއީއޯ އިސްތިއުފާ ދެއްވިދެއްވުމަށް ވާހަކަ ދެއްކުމުން އެވާހަކަތަކާ ގުޅިގެން ނާޒިލް ވަނީ ކުންފުނިތަކުގެ ސީއީއޯއިންނާއި ޑިރެކްޓަރުން އިސްތިއުފާ ދިނުމަށް މަޖުބޫރު ކުރަމުންދާކަމަށް ވިދާޅުވެފައެވެ. ނާޒިލް ވިދާޅުވީ އެ ބޭފުޅުން މަގާމުތަކުން އިސްތިއުފާ ދެއްވަނީ މަޖުބޫރީ ހާލަތުގައި ކަމަށެވެ.
ނާޒިލް ވިދާޅުވީ މިހާރު ޤާނޫނަށް ހުށަހަޅާފައިވާ އިސްލާހުން، ކުރިއަށް އޮތްތަނުގައި ކުންފުނިތަކުގެ ބޯޑުން ގަނޑުކޮށް މީހުން ވަކިކުރާ މަންޒަރު ފެންނަކަމަށެވެ. އަދި މިގޮތަށް އިސްލާހު ގެނައުމުން ކުންފުނިތަކުގެ ބޯޑުގައި ތިބި އިލްމީ ބޭފުޅުންގެ ބަދަލުގައި އެތަންތަނަށް ސިޔާސީ މީހުން އައްޔަނުކޮށް ކުންފުނިތައް ހަލާކުވާނެ ކަމަށް ވިދާޅުވިއެވެ.
ސަރުކާރުގެ ފަރާތުން ކުންފުނީގެ ޤާނޫނަށް އިސްލާހު ހުށަހަޅުއްވާފައިވަނީ ފޭދޫ އުތުރު ދާއިރާގެ މެންބަރު އިސްމާއިލް ނިޒާރުއެވެ. މިއަދު ކުރިއަށްގެންދާ މަޖިލީހުގެ ދައުރުން ބޭރުން ބާއްވާ ހާއްސަ ޖަލްސާގައި ވަނީ މި ބިލުގެ ބަހުސް ފަށާފައެވެ.
މި އިސްލާހު ހުށަހެޅުމުގެ ބޭނުމުގެ ގޮތުގައި ބުނެފައިވަނީ، ކުންފުންޏެއްގެ ހާއްސަ އާންމު ޖަލްސާއެއް ބޭއްވުމަށްޓަކައި ފުރިހަމަކުރަންޖެހޭ އިޖުރާއަތުތަކަށް ބައެއް ބަދަލުގެނައުމެވެ. ކުންފުނީގެ ޤާނޫނަށް އިސްލާހު ހުށަހަޅާފައިވަނީ 100، 113 އަދި 126 ވަނަ މާއްދާއަށެވެ.