ކުންފުނިތަކުގެ ބޯޑަށް ޑިރެކްޓަރުންގެ އަދަދު އިތުރުކުރެވޭގޮތް ހަދަނީ ސިޔާސީ މަގާމުތައް އިތުރުކުރުމަށް ކަމަށް ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ސަރުކާރުގެ ފަރާތުން ކުންފުނީގެ ޤާނޫނަށް ހުށަހަޅާފައިވާ އިސްލާހުގެ ބަހުސް ކުރިއަށް ގެންގޮސްފައިވާއިރު، ހުށަހަޅާފައިވާ އިސްލާހުގައި ބުނެފައިވަނީކުންފުނީގައި ތިބެންޖެހޭ އަދަދަށް ޑިރެކްޓަރުން އަދި މެނޭޖިން ޑިރެކްޓަރެއް ނެތްނަމަ ނުވަތަ އެކަން ރަޖިސްޓްރާގެ ސަމާލުކަމަށް އެއްވެސް ފަރާތަކުން ގެނެސްފިނަމަ ޑިރެކްޓަރުން އަދި މެނޭޖިން ޑިރެކްޓުން އައްޔަނު ކުރުމަށް ކުންފުންޏަށް އެންގުމުގެ ބާރު ރަޖިސްޓްރާއަށް ލިބިގެންވާ ކަމަށެވެ. އަދި އެގޮތަށް އެންގުމުން 10 ދުވަހުގެ ތެރޭގައި ކުންފުންޏަށް ބޭނުންވާވަރަށް ޑިރެކްޓަރުން އަދި މެނޭޖިޮން ޑިރެކްޓަރު އައްޔަނުކޮށް އެކަން ރަޖިސްޓްރާއަށް ހުށަހަޅަންޖެހޭނެ ކަމަށްވެސް އިސްލާހުގައި ބުނެފައިވެއެވެ.
މި އިސްލާހާ މެދު ކަންބޮޑުވުން ފާޅުކޮށް ވާހަކަ ދައްކަވަމުން ޒިޔާދު ވިދާޅުވީ އިސްލާހު ހުށަހަޅާފައިވަނީ ކުރިން އޮތްގޮތަށްވުރެ ފަސޭހަކޮށް ކުންފުނިތަކުގެ ބޮޑަށް ޑިރެކްޓަރުން އައްޔަނު ކުރެވޭ ގޮތަށް ކަމަށެވެ. އަދި އެއީ ސިޔާސީ މަގާމުތައް އިތުރުކުރުމަށް ކުރާ ކަމެއްކަމަށްވެސް ތުހުމަތު ކޮށްފައިވެއެވެ.
ސަރުކާރުން ވަރަށް މަސައްކަތް ކުރަމުންދާ ކަމަށާއި އެގޮތުން އެކި ގައުމުތަކަށް ސިޓީ ފޮނުވަމުންދާކަމަށް ޒިޔާދު ވިދާޅުވިއެވެ. އެހެންނަމަވެސް އަދިވެސް ތަކެތީގެ އަގު ހުރީ އިންތިހާ ދަރަޖައަށް މަތީގައި ކަމަށާއި، ރައްޔިތުންނަށް އެއްވެސް މަންފާއެއް އަދި ނުކުރާ ކަމަށް ވިދާޅުވިއެވެ.
" 'ކުރީ ސަރުކާރަކީ' އަބަދަށް އޮތް ފަރުވާއެއް ނޫން. ރައްޔިތުންނަށް ކޮންމެސް އެއްޗެއް އެބަ ދޭންޖެހޭ. އަބަދު ކުރީ ސަރުކާރު، ކުރީ ސަރުކާރަކުން މިކަމުން ސަލާމަތެއް ނުވެވޭނެ." ޒިޔާދު ވިދާޅުވިއެވެ.
ސަރުކާރުގެ ފަރާތުން ކުންފުނީގެ ޤާނޫނަށް އިސްލާހު ހުށަހަޅުއްވާފައިވަނީ ފޭދޫ އުތުރު ދާއިރާގެ މެންބަރު އިސްމާއިލް ނިޒާރުއެވެ. މިއަދު ކުރިއަށްގެންދާ މަޖިލީހުގެ ދައުރުން ބޭރުން ބާއްވާ ހާއްސަ ޖަލްސާގައި ވަނީ މި ބިލުގެ ބަހުސް ފަށާފައެވެ. އަދި މި ބިލު ވަނީ މަޖިލީހަށް ބަލައިވެސް ގަނެފައެވެ.