ހުސްވެފައިވާ ޕްރޮސެކިއުޓާ ޖެނެރަލް (ޕީީޖީ)ގެ މަގާމަށް ރައީސް އޮފީހުގެ ލީގަލް ސެކްރެޓަރީ އައްބާސް ޝަރީފް އައްޔަންކުރަން ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިއަދު ފާސްކޮށްފި އެވެ.
ޕްރޮސިކިއުޓަ ޖެނެރަލްގެ މަގާމަށް ކުރިމަތިލާން ހުޅުވާލީ އެ މަގާމުގައި ހުންނެވި ހުސެއިން ޝަމީމް މަގާމުން އިސްތިއުފާ ދެއްވުމުންނެވެ.
ޕީޖީގެ މަގާމަށް އާންމުކޮށް ހުޅުވާލުމުން ކުރިމަތިލެއްވި ބޭފުޅުންގެ ތެރެއިން ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވެވީ އައްބާސްގެ ނަން އެކަންޏެވެ. އައްބާސްގެ ނަން ޖުޑިޝަރީ ކޮމިޓީން ދިރާސާކުރިއިރު އޭނާއާ މިއަދު ވަނީ އިންޓަވިއު ވެސް ކޮށްފަ އެވެ.
އެ އިންޓަވިއު އަށްފަހު ކޮމިޓީގެ މުގައްރިރު އަދި މަނަދޫ ދާއިރާގެ މެންބަރު ހުސްނީ މުބާރަކް ވިދާޅުވީ ވިދާޅުވީ އައްބާސްއާ ގުޅޭގޮތުން ޝަކުވާއެއް އޮތްތޯ ބަލަން ހުޅުވާލި ފުރުސަތުގައި އެއްވެސް ޝަކުވާއެއް ލިބިފައި ނުވާ ކަމަށެވެ. އަދި އިންޓަވިއު އިން އައްބާސް އަށް 93.91 ޕަސެންޓް މާކްސް އައްބާސް އަށް ލިބިފައިވާ ކަމަށްވެސް ހުސްނީ ވިދާޅުވި އެވެ.
އައްބާސް އަށް ރުހުން ދޭން ފެންނަކަމަށް ޖުޑިޝަރީ ކޮމިޓީން ފާސްކުރީ ވޯޓްގައި ބައިވެރިވެވަޑައިގެންނެވި މެންބަރުންގެ އިއްތިފާޤުންނެވެ.
ޕީޖީގެ މަގާމު ހުސްވެއްޖެ ނަމަ، ލަސްވެގެން 30 ދުވަހުގެ ތެރޭގައި އާ ބޭފުޅަކު މަގާމަށް އައްޔަންކުރަން ޖެހޭނެ ކަމަށް ގާނޫނުގައި ބުނެފައިވެ އެވެ.