އޮލިމްޕަހުގައި ހައުސްފިލް ޝޯތަކެއް ދެއްކުމަށް ފަހު، ފިލްމު "ކަމަނާ" ޝްވެކް ސިނަމާގައި އަޅުވަން ނިންމައިފި އެވެ.
މާލެ އާއި ހުޅުމާލޭގައި ޝްވެކް ސިނަމާ ހިންގަމުން އަންނަ އިރު، މި މަހުގެ 20 އިން ފެށިގެން ހުޅުމާލޭގެ ޝްވެކް ސިނަމާގައި ފިލްމު އަޅުވަން މިއަދު އެއްބަސްވުމުގައި ވެސް ސޮއިކޮށްފައިވެ އެވެ. "ކަމަނާ" ގެ ފަރާތުން އެއްބަސްވުމުގައި ސޮއިކުރީ ފިލްމުގެ ޑައިރެކްޓަރު ހުސައިން މުނައްވަރެވެ.
މިދިޔަ މަހުގެ 27 ގައި އޮލިމްޕަހުގައި ޕްރީމިއާކުރި ފިލްމުގެ 37 ހައުސްފުލް ޝޯ ދެއްކި އިރު، އެންމެ ފަހުގެ ޝޯތައް ދައްކާނީ މިރެ އެވެ.
"ކަމަނާ" އަކީ މި ފަހުގެ ތާރީހެއްގައި އޮލިމްޕަހުގައި އެޅުވި ފިލްމުތަކުގެ ތެރެއިން ހައުސްފުލްކޮށް ހުރިހާ ޝޯތަކެއް ދެއްކި ހަމައެކަނި ފިލްމެވެ.
ގެވެށިއަނިޔާގެ ހަގީގީ ހާދިސާތަކެއްގެ މައްޗަށް ހަދާފައިވާ މި ފިލްމަކީ މަހުދީ އަހުމަދުގެ ސްކްރީންޕްލޭއަކަށް ހެދި ފިލްމެކެވެ. މީގެ ލީޑް ކާސްޓްގައި ހިމެނެނީ މަރިޔަމް އައްޒަ އާއި ޔޫސުފް ޝަފީއު (ޔޫއްޕެ) ގެ އިތުރުން އައިމިނަތު ރަޝްފާ (އާޝާ) އެވެ.
"ކަމަނާ" މިހާތަނަށް ވަރަށް ގިނަ ރަށްރަށުގައި ވެސް ދައްކާފައިވާ އިރު، މިހާރު ވެސް ގިނަ ރަށްތަކެއްގައި އަޅުވަން ތާވަލުކޮށްފައިވެ އެވެ. އަދި ބައެއް ރިސޯޓްތަކުގައި ވެސް ފިލްމު ދައްކަން ހަމަޖެހިފައިވާ އިރު، ސްރީ ލަންލާގައި ވެސް ފިލްމު އަޅުވަން ހަމަޖެހިފައިވެ އެވެ.