ދިވެހި ދިދަ އަށް ގާނޫނީ ހިމާޔަތް ދިނުމަށް ބިލެއް ޑްރާފްޓް ކުރުމުގެ މަސައްކަތް ފަށައިފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ދިވެހި ބަހާއި ތަރިކައާ ގުޅޭ މިނިސްޓަރު އާދަމް ނަސީރު އިބްރާހިމް ވިދާޅުވީ ދިވެހި ދިދަ އާއި ދައުލަތުގެ ނިޝާނަށް ގާނޫނީ ހިމާޔަތް ބޭނުންވާ ކަމަށެވެ. މިހާރު ފެންނަން ހުރި ގޮތަށް ބަލާއިރު ދައުލަތުގެ ނިޝާނުގެ އިންތަކާއި މިންތައް ކަނޑައެޅޭ ވަކި ހަމަތަކެއް ގާނޫނެއްގެ ސިފައިގައި ލިޔެފައި ނެތް ކަމަށްވެސް މިނިސްޓަރު ވިދާޅުވި އެވެ.
"އެހެންވީމާ ސަރުކާރުގެ ވިސްނުން އެކަމުގައި އެބައޮތް އަދި މިހާރު ތާވަލު ކުރެވިފައި ވެސް އެބައޮތް ދިވެހި ދައުލަތުގެ މިކަހަލަ ގައުމީ ރަމްޒުތައް ހިމާޔަތްކުރުމަށްޓަކާ ބިލެއް ޑްރާފްޓް ކުރުން،" މިނިސްޓަރު ވިދާޅުވި އެވެ.
ރައީސް ޑރ. މުހައްމަދު މުއިއްޒުގެ ސިޔާސަތުތަކުގެ ތެރޭގައި ދިވެހި ދިދަ އަށް ހުރިހާ ގޮތަކުން ހިމާޔަތާއި ރައްކާތެރިކަން ދިނުން ހިމެނޭ ކަމަށާއި އަދި ދައުލަތުގެ ނިޝާނާއި ދިވެހިންގެ އިއްޒަތާއި ގުޅިފައި ހުރި މިފަދަ ހުރިހާ މީގެތެރެއިން އަންނާނެ ކަމަށްވެސް މިނިސްޓަރު ވިދާޅުވި އެވެ.
ރައީސް މުއިއްޒު ވެރިކަމާ ހަވާލުވެވަޑައިގެންނެވުމަށްފަހު އެންމެ ފުރަތަމަ ނިންމެވި ކަންކަމުގެ ތެރޭގައި ސަރުކާރުގެ ރަސްމީ އޮފީސްތަކާއި އިދާރާތަކުގައި 24 ގަޑިއިރު ދިވެހި ގައުމީ ދިދަ ނަގައިފައި ބެހެއްޓުން ހިމެނެ އެވެ.