ބޮލީވުޑްގެ ފިލްމީ ތަރި ސަލްމާން ޚާން އެމެރިކާގައި ޓުއާއެއް ބާއްވަން އުޅޭ ކަމަށް ބުނެ ސްކޭމެއް ހިންގާތީ އެކަމަށް ފޭނުން ސަމާލުވާން އެދި، އެކަން ކުރާ ފަރާތްތަކަށް އިންޒާރު ވެސް ދީފި އެވެ.
ސަލްމާންގެ ފަރާތުން ނެރުނު ބަޔާނެއްގައި ބުނީ ސީދާ އޭނަ އާއި އަދި އޭނައާ ގުޅުން ހުރި އެއްވެސް ފަރާތަކުން ވެސް އެމެރިކާގައި ޓުއާއެއް ބާއްވަން ނޫޅޭ ކަމަށާއި އެކަމާ ބެހޭ ގޮތުން ފަތުރަނީ ދޮގު ކަމަށެވެ. އެހެންވެ ސަލްމާނާ ގުޅުވައިގެން ފޮނުވާ މެއިލްތަކާއި މެސެޖްތަކާއި މެސެޖްތަކާއި އިޝްތިހާރުތަކާއި އެ ނޫން ވެސް ޕްރޮމޯޝަނަލް އިވެންޓްތަކަށް އިތުބާރު ނުކުރަން އެދިފައިވެ އެވެ.
ސަލްމާންގެ ބަޔާނުގައި މި ސްކޭމް ހިންގާ ފަރާތްތަކަށް ގާނޫނީ ފިޔަވަޅު ވެސް އަޅާނެ ކަމަށެވެ.
ދާދި ފަހުން ސަލްމާންގެ ފިލްމު ކުންފުނި، އެސްކޭފުން ކާސްޓުން ކޯލަކަށް ހުޅުވާލި ކަމަށް ބުނެ ސްކޭމެއް ހިންގާފައިވެ އެވެ. އެކަމާ ގުޅިގެން ވެސް ސަލްމާން އެކަން ދޮގުކޮށް ބަޔާނެއް ނެރެފައިވެ އެވެ.
މީގެ ކުރިން ވެސް މަޝްހޫރު އެކިއެކި ފިލްމީ ތަރިންގެ ނަމުގައި ސްކޭމްތައް ހިންގުމުގެ މައްސަލަތައް ފެންމަތިވެފައިވެ އެވެ.