ކެރިއާ ގައިޑެންސަށް ހާއްސަކޮށްގެން ނެޝަނަލް ކެރިއާ ސާވިސްގެ ޕްރޮގްރާމެއް މި މަހުގެ ތެރޭގައި ފަށަން ތައްޔާރުވެއްޖެ އެވެ.
ހަޔަ އެޑިއުކޭޝަން މިނިސްޓްރީން ބުނީ މި ޕްރޮގްރާމް މާލެ އާއި އަތޮޅު ތެރޭގައި ވެސް ކުރިއަށް ގެންދާނެ ކަމަށެވެ.
ހަޔަ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ނަޒީރު ވިދާޅުވީ ކުރިން ޖޮބް ސެންޓަރުގެ ނަމުގައި ހިންގި މިހާރުގެ ނެޝަނަލް ކެރިއާ ސާވިސް އިން ރާއްޖެއަށް ބޭނުންވާ ދާއިރާތަކުން މީހުން ބިނާކުރުމަށް ބާރު ސްޕީޑްގައި މަސައްކަތްތަކެއް ފެށުމަށް މިހާރު ތައްޔާރުވެފައިވާ ކަމަށެވެ.
"ކެރިއ ގައިޑެންސް އަކީ މިހާރު އެތަނުން ކުރާނެ އެންމެ ބޮޑު އެއް މަސައްކަތް. އަޅުގަނޑުމެން މިހާރު މި މަހުގެ ފަހުކޮޅާއި އަންނަ މަހުގެ ކުރީކޮޅުން ފެށިގެން އަތޮޅުތަކަށާއި އަދި މާލޭގައި ކެރިއަރ ގައިޑެންސް ވަރަށް ބާރު ސްޕީ ގައި ފެށުމަށް މިހާރުވަނީ ޕްލޭންތަކެއްކޮށްގައި." އޭނަ ވިދާޅުވި އެވެ.
ނަޒީރު ވިދާޅުވި ގޮތުގައި އަމާޒަކީ އަހަރަކު ދެ ފަހަރު ކެރިއާ އެކްސްޕޯއެއް ވެސް ބޭއްވުން ކަމަށެވެ. އޭގެ ތެރެއިން ކައުންސެލިން އާއި މަތީ ތައުލީމުގައި ހުރި ފުރުސަތުތަށް ދަރިވަރުންނަށް ފޯރުކޮށް ދޭނެ އެވެ. އަދި ރާއްޖޭގައި ހުރި ދުނިޔޭގެ ފެންވަރުގެ އިންސްޓިޓިއުޓްތަކުން މަތީ ތައުލީމުގެ ދާއިރާތަކުން ލިބެން ހުރި ފުރުސަތުތަކުގެ މައުލޫމާތު ވެސް އެއް ފުރާޅެއް ދަށުން ދޭނެ އެވެ.