އަންނަ ބުރާސްފަތި ދުވަހު ރާއްޖޭގައި އަލަށް އިންޓަނޭޝަނަލް ބަންކަރިން ހިދުމަތް ދޭން ފަށާ އިރު މިހާރު ވެސް ބުކިންސްތައް ހަދަމުން އަންނަ ކަމަށާއި އެންމެ ފުރަތަމަ ހިދުމަތް ދޭނީ، "ވައިސީ ބެރިއާ" ނަމަކަށް ކިޔާ އުޅަނދަކަށް ކަމަށް އެސްޓީއޯ އިން ބުނެފި އެވެ.
އެ ކުންފުނިން ބުނީ މިއީ ޝެޑިއުލްޑް ބަންކަރިންއެއް ކަމަށެވެ.
ޕެނަމާގައި ރަޖިސްޓްރީކޮށްފައިވާ "ވައިސީ ބެރިއާ" އަކީ ކޮލަމްބޯ އާއި މާލެއާ ދެމެދު ދަތުރު ކުރާ 1،100 ކޮންޓެއިނަރުގެ ބޯޓެކެވެ. އަދި މި ބޯޓަކީ މަހެއްގެ މައްޗަށް 200 ޓަނުގެ ތެޔޮ ބޭނުން ކުރާ އުޅަނދެކެވެ. ރާއްޖޭގައު ފަށާ ބަންކަރިންގެ ހިދުމަތުގައި އެސްޓީއޯގެ ދައުރަކީ އުޅަނދުތަކަށް ބޭނުންވާ ތެޔޮ ފޯރުކޮށް ދިނުމެވެ.
އަދި ބަންކަރިންއާ ގުޅޭ އެހެން ހިދުމަތްތަް ފޯރުކޮށް ދޭނީ މޯލްޑިވްސް ޕޯޓްސް ލިމިޓެޑް (އެމްޕީއެލް) އިންނެވެ. އެގޮތުން އިހަވަންދިއްޕޮޅުގައި މި ހިދުމަތް ދޭން ގާއިމުކުރާ އޮފީސް ހުންނާނީ ހއ. އުލިގަމުގަ އެވެ.
އެސްޓީއޯ އިން ބުނީ ބަންކަރިންގެ ހިދުމަތަށް އެދި މިހާރު ވެސް ބުކިންތައް ލިބެމުން އަންނަ ކަމަށާއި ބަންކަރިންގެ ހިދުމަތް ރާއްޖޭގައި ފުޅާކޮށް މާކެޓު އިތުރަށް ވަރުގަދަވެގެން ދާނެ ކަމަށެވެ.
ރާއްޖޭގެ އުތުރުގައި ބަންކަރިން ހިދުމަތަށް ދެ ބޯޓް އެސްޓީއޯ އިން ގެނެސްފައިވެ އެވެ. އެއީ ގާތްގަނޑަކަށް 4،000 ޓަނުގެ ތެޔޮ އުފުލޭ "މެރިން ބެއްލާ" އާއި "މެރިން އެންޖެލް" އެވެެ.
އިހަވަންދިއްޕޮޅުގައި ބަންކަރިންގެ ހިދުމަތް ފަށަން އެސްޓީއޯ އިން ދުބާއީގެ ވިޓޯލްއާ އެކީ އެކު އެމްޔޫއޯއެއްގައި ސޮއިކުރީ މި އަހަރުގެ މާޗު 13 ގަ އެވެ.