ބޮލީވުޑްގެ ޒުވާން ދެ ފަންނާނުން ކަމަށްވާ ޖުނައިދު ޚާނާއި ހުޝީ ކަޕޫރް މިހާރު ކުޅެމުން އަންނަ ފިލްމު ރިލީޒްކުރާ ތާރީހު މިއަދު އިއުލާންކޮށްފި އެވެ.
ނަން އަދި ހާމަނުކުރާ މި ލޯބީގެ ފިލްމު ސިނަމާތަކަށް ގެންނަން ތާވަލުކުރީ އަންނަ އަހަރުގެ ފެބްރުއަރީ 7 އަށެވެ. ފޭންޓަމް ސްޓޫޑިއޯސް އާއި އޭޖީއެސް އެންޓަޓައިންމަންޓް ގުޅިގެން ހަދާ މި ފިލްމު ބެލުންތެރިންނަށް ގެނެސްދޭނީ ޒީ ސްޓޫޑިއޯސްއާ ގުޅިގެންނެވެ.
އަންނަ އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ ފިލްމުގެ ޑައިރެކްޓަރަކީ އަދުވައިތު ޗަންދަނެވެ. އޭނަ އަކީ ޖުނައިދުގެ ބައްޕަ އާމިރު ޚާންގެ އެންމެ ފަހުގެ ފިލްމު 2022 ގެ "ލާލް ސިންގް ޗައްޑާ" ގެ ޑައިރެކްޓަރެވެ. ރިޕޯޓްތައް ބުނާ ގޮތުން ޖުނައިދާއި ކުރީގެ ބަތަލާ ސްރީދޭވީގެ ހަގު ދަރިފުޅު ހުޝީގެ ފިލްމަކީ 2022 ގެ ތަމަޅަ ފިލްމު "ލަވް ޓުޑޭ" ގެ ރިމޭކެކެވެ.
ޖުނައިދުގެ ފުރަތަމަ ފިލްމަކީ ޖޫންގައި ނެޓްފްލިކްސް އިން ގެނެސްދިން ޔާޝްރާޖް ފިލްމްސް (ވައިއާރްއެފް) ގެ "މަހާރާޖް" އެވެ. ހުޝީގެ ފުރަތަމަ ފިލްމަކީ މިދިޔަ އަހަރުގެ ޑިސެމްބަރުގައި ނެޓްފްލިކްސް އިން ގެނެސްދިން ޑައިރެކްޓަރު ޒޯޔާ އަޚްތަރުގެ "ދި އާޗީސް" އެވެ.