އެމެޒޯން ޕްރައިމް ވީޑިއޯ އަށް ބޮލީވުޑްގެ މަޝްހޫރު ޑައިރެކްޓަރު ކަރަން ޖޯހަރް ހޯސްޓް ކުރާ އާ ރިއަލިޓީ ސީރީޒް މިއަދު އިއުލާންކޮށްފި އެވެ.
މިދިޔަ ހަފުތާގައި މީޑިއާތަކުން ރިޕޯޓްކޮށްފައިވާ ގޮތަށް މި ޝޯގެ ނަމަކީ "ދަ ޓްރެއިޓާސް" އެވެ. މީގެ ޝޫޓިން މިހާރު ޖައިލްސަލްމާރުގައި ކުރިއަށްދާ އިރު މިއީ "ދަ ޓްރެއިޓާސް" ގެ ނަމުގައި ސްޓްރީމިން އެމެރިކާގެ ޕްލެޓްފޯމް، ޕީކޮކުން ގެނެސްދޭ ޝޯގެ އިންޑިއާގެ ވާޝަނެވެ.
އެ ޝޯގެ ދެ ސީޒަނެއް މިހާތަނަށް ގެނެސްދީފައިވެ އެވެ. "ދަ ޓްރެއިޓާސް" އަކީ ނެދަލޭންޑްސް އިން "ޑެ ވެރެންޑާސް" ގެ ނަމުގައި ގެނެސްދިން ޝޯއެއް އަސްލަކަށް ބަލައިގެން ގެނެސްދޭން ފެށި އެއްޗެކެވެ.
މީގެ އިންޑިއާ ވާޝަން ކަރަން ހޯސްޓްކޮށް ގެނެސްދޭ އިރު، އިންޑިއާގެ މަޝްހޫރު 20 ސެލެބްރިޓީއަކު "ދަ ޓްރެއިޓާސް" އިން ފެންނާނެ އެވެ. ނަމަވެސް އެއީ ކޮންކޮން ބައެއް ކަމެއް އަދި ކަށަވަރެއް ނުވެ އެވެ. އަދި މި ސީރީޒް ގެނެސްދޭން ފަށާނެ އިރެއް ވެސް އެމެޒޯން ޕްރައިމް ވީޑިއޯ އިން ހާމައެއް ނުކުރެ އެވެ.
ކަރަން އަކީ މިހާރު ވެސް "ކޮފީ ވިތު ކަރަން" ގެ ނަމުގައި އަމިއްލަ ޓޯކް ޝޯއެއް ހޯސްޓްކުރާ މީހެކެވެ. އޭގެ 8 ވަނަ ސީޒަން މިދިޔަ އަހަރު ގެނެސްދީފައިވާ އިރު، ޝޯގެ އާ ޕްލެޓްފޯމަކީ ޑިޒްނީ ޕްލަސް ހޮޓްސްޓާ އެވެ.
ބޮލީވުޑްގެ އެންމެ ކާމިޔާބު ޑައިރެކްޓަރުން/ޕްރޮޑިއުސަރުންގެ ތެރޭގައި ހިމެނޭ ކަރަންގެ އެންމެ ފަހުގެ ފިލްމަކީ މިދިޔަ އަހަރުގެ "ރޮކީ އޯރް ރާނީ ކީ ޕްރޭމް ކަހާނީ" އެވެ. އޭނަ ދެން ހަދަން އިއުލާންކޮށްފައި އޮތީ ކެރިއަރުގައި ޑައިރެކްޓްކުރަން ހަމަޖެހިފައިޗާ ފުރަތަމަ އެކްޝަން ފިލްމެވެ.