މި މަހުގެ 26 ވަނަ ދުވަހަކީ ވަރަށް ހާއްސަ ދުވަހެކެވެ. އެ ދުވަަހަކީ ގިނަ ބަޔަކު، ހާއްސަކޮށް ކުޑަކުދިންތަކެއް ވަރަށް ބޮޑަށް އިންތިޒާރު ކުރަމުން އަންނަ ފިލްމު "ރޮބޯމޭމް: ދަ މޫވީ" ޕްރީމިއާކުރާ ދުވަހެވެ.
މިއީ ކުޑަކުދިންނަށް ހާއްސަ ފިލްމަކަށް ވިޔަސް، މިއީ ހަމަ ހުރިހާ އުމުރެއްގެ މީހުން ބަލާލަން ވަރަށް ރަނގަޅު ފިލްމަކަށް ވާނެ އެވެ. ސަބަބަކީ މިއީ 2040 އަށް ދިވެހިން ގެނެސްދޭނެ ފިލްމަކަށްވާތީ އެވެ. "ރޮބޯމޭން: ދަ މޫވީ" އެންމެ ހާއްސަވާ އެއް ކަމަކީ ވެސް މިއީ އެވެ. މީގެ ޕްލޮޓް އޮތް ގޮތުން ފިލްމުގެ ވާހަކައިގެ ތެރެއިން ބެލުންތެރިން ދުރު މުސްތަގުބަލަކަށް ގެންގޮސްދީ، ސިނަމާގައި މުޅިން ތަފާތު ތަޖުރިބާއެއްކޮށްލުމުގެ ފުރުސަތު ދޭނެ އެވެ.
އެގޮތުން "ރޮބޯމޭން: ދަ މޫވީ" ގައި 2040 ގައި ރާއްޖޭގެ ވެރިރަށް މާލެ އޮންނާނެ ގޮތުގެ "ފިއުޗަރިސްޓިކް" ޒަމާން ދައްކުވައި ދޭނެ އެވެ. އެ ޒަމާނަށް ދާ އިރު އުމްރާނީ ގޮތުން ވަރަށް ބޮޑެތި ކުރިއެރުންތަކެއް ހޯދާފައިވާ ތަން ފިލްމު ހީ ވެސް ނުކުރާ ކަހަލަ ގޮތަކަށް ދައްކުވައި ދޭނެ އެވެ.
މިއީ މީގެ ކުރިން ދިވެހި ފިލްމަކުން ތަޖުރިބާ ކުރެވިފައި ނެތް ކަމަކަށްވާތީ "ރޮބޯމޭން: ދަ މޫވީ" އަކީ ހަމަ ކޮންމެ ދިވެއްސަކު ވެސް ނުބަލައި ދޫކޮށްލާ ވަރުގެ ފިލްމެއް ނޫނެވެ.
މީގެ ސްކްރީންޕްލޭ ލިޔުނު ކުޅަދާނަ ސްކްރީންރައިޓަރު މަހުދީ އަހުމަދު އޭނަގެ ބްލޮގްގައި ވަނީ ފިލްމުގެ ސިނަމޮޓޯގްރަފީ އާއީ ސީޖީއައި ކޮމްޕިއުޓަ ޖެނެރޭޓެޑް (އިމޭޖެރީ) ގެ މަސައްކަތްކުރި ފަންނުވެރިޔާ މުހައްމަދު ސާމީގެ މަސައްކަތަށް ވަރަށް ބޮޑަށް ތައުރީފުކޮށްފަ އެވެ. އޭނަ ބުނެފައި ވަނީ "ރޮބޯމޭން: ދަ މޫވީ" އަކީ ސާމީގެ ވަރަށް ފުރިހަމަ އެހާމަ މޮޅު މަސައްކަތްތަކެއް ބެލުންތެރިންނަށް ބޮޑު ސްކްރީނުން ދައްކުވައި ދޭނެ ފިލްމެއް ކަމަށެވެ.
އެހެންވެ މިއީ ވަރަށް ހިތްގައިމު ތަޖުރިބާއަކަށް ދިވެހިންނަށްވާނެކަމުގެ ޔަގީންކަން ވެސް އޮތް ކަމަށް މަހުދީ ބުންޏެވެ.
އޭނަ ބުނެފައި ވަނީ 2040 ގައި މާލެ އޮންނާނެ ގޮތުގެ ތަސައްވުރުގެ ސާމީގެ ހިޔާލާއި ވިސްނުމާއި ފިކުރާ އެކީ ގެނެސްދީފައިވާ ގޮތުން މިއީ ދިވެހި ފިލްމަކުން މިހާތަނަށް ފެނިފައި ނުވާ ފަދަ މަންޒަރުތަކެއް ދައްކުވައި ދޭނެ ފިލްމެއް ކަމަށެވެ. އެގޮތުން ލައިވް-އެކްޝަންގެ ތެރެއަށް ސީޖީއައި ފައްތައިގެން އަސްލާ ވަރަށް އެއްގޮތަށް ފިލްމުގެ މަންޒަރުތަކުން ބެލުންތެރިންގެ މުޅިން އެހެން ދުނިޔެއަކަށް ގެންގޮސްދޭނެކަމުގެ ޔަގީކަން، އޮލިމްޕަހުގައި އެންމެ ފަހުން ދެއްކި ފިލްމު "ކަމަނާ" ގެ ވެސް ސްކްރީން ރައިޓަރު ދީފައިވެ އެވެ.
މަހުދީގެ ބްލޮގްގައި ފާހަގަކޮށްފައިވާ ގޮތުގައި 2040 ގައި މާލެ ފެންނާނެ ގޮތާ އެކީ، "ރޮބޯމޭން: ދަ މޫވީ" އިން ދައްކުވައި ދޭނެ އެންމެ ޖާދުވީ އެއް ކަމަކީ ރޮބޯމޭންގެ ކެރެކްޓާގެ ޒަމާނީ އެޕާޓްމަންޓެވެ. އެހެންވެ ކުޑަކުދިންގެ އިތުރު ބޮޑެތި މީހުންގެ މެދުގައި ވެސް މަގުބޫލު "ރޮބޯމޭން" ގެ ދުނިޔެ ބަލައިލަން "ރޮބޯމޭން: ދަ މޫވީ" އަކީ ހަމަ ރަނުގެ ފުރުސަތަކަށް ވާނެ އެވެ.
މި ފިލްމު މި މަހުގެ 26 ގައި އޮލިމްޕަހުގައި ޕްރީމިއާ ކުރަން ތައްޔާރުވަމުން އަންނަ އިރު، ފިލްމުގެ ޓްރެއިލާ ވެސް ބަލާލުން ހަމަ ވަރަށް ރަނގަޅުވާނެ އެވެ. ޓްރެއިލާގެ އެންމެ ފަހުން މަންޒަރުން ވެސް މަހުދީ ބުނި ގޮތަށް ދިވެހިން ދާނީ "ރޮބޯމޭން: ދަ މޫވީ" ގެ ތެރެއިން ކުލަގަދަ މުސްތަގުބަލަކަށެވެ.
މި ފިލްމު ޑައިރެކްޓްކޮށްފައި ވަނީ މަޝްހޫރު ކެމެރާމަން އިބްރާހީމް ވިސާން (ކަނޑި) އެވެ.
"ރޮބޯމޭން: ދަ މޫވީ" އިން ވަރަށް އާ މޫނުތަކެއް ވެސް ފެނިގެން ދާނެ އެވެ. އަދި ފިލްމުން ހުނަރުވެރި ކުޑަކުދިންތަކެއްގެ މަސައްކަތް ފެނިގެން ދާނެ އެވެ.
އޮލިމްޕަހުގައި ދައްކަން ހަމަޖެހިފައިވާ ޝޯތަކަށް ބާރު ބޮޑުވެފައިވާ އިރު، "ރޮބޯމޭން: ދަ މޫވީ" އަޅުވަން ބޭނުންވާ ރަށްރަށަށް އެ ފުރުސަތު ވެސް ފިލްމުގެ ޓީމުން މި ވަނީ ހުޅުވާލައިފަ އެވެ. ސްކްރީނިން އިންތިޒާމު ކުރަން ގުޅާނީ މި 7777968 ނަމްބަރަށެވެ.