ލ. އަތޮޅުން ކައުންސިލުން "ލާމަސީލު ހިފުޒް ޕްރޮގްރާމް" ގެ ނަމުގައި ކީރިތި ޤުރުއާން ހިތުދަސްކުރާ ޕްރޮގްރާމެއް ކުރިއަށް ގެންދަން ނިންމައި، ބައިވެރިން ދަސްކުރާ ކޮންމެ ފޮތަކަށް 500ރ. ދޭން ނިންމައިފި އެވެ.
މި ޕްރޮގްރާމަކީ ލ. އަތޮޅު ކައުންސިލުން ކީރިތި ޤުރުއާނާ ބެހޭ ޤައުމީ މަރުކަޒާ ގުޅިގެން އެ އަތޮޅުގައި ޙާފިޡުން އުފެއްދުމަށާއި، ކީރިތި ޤުރުއާން ހިތުން ދަސްކުރުމަށް ބާރު އެޅުމުގެ ކުރިއަށް ގެންދާ ޕްރޮގްރާމެކެވެ.
ހަމައެކަނި ލާމު އަތޮޅުގެ ރައްޔިތުންނަށް ބައިވެރިވޭ މި "ލާމަސީލު ހިފުޒް ޕްރޮގްރާމް" ގައި ބައިވެރިވެވޭނީ 6 އަހަރުން މަތީގެ އުމުރު ފުރައަށެވެ. އަދި 18 އަހަރު ނުފުރޭ ކުދިންނަށް މި ޕްރޮގްރާމުގައި ބައިވެރިވެވޭނީ ބެލެނިވެރިންނާއެކު ހަދާ އެއްބަސްވުމެއްގެ ދަށުންނެވެ.
ލ. އަތޮޅު ކައުންސިލުން ބުނީ ހިފްޒު ކުރާ ފަރާތްތަކަށް ހިތުދަސްކުރާ ކޮންމެ ފޮތަކަށް 500ރ. ގެ އިނާމެއް ދޭނެ ކަމަށެވެ.
"ލާމަސީލު ހިފްޒު ޕްގޮރްގާމް" ގެ އުސޫލުގައިވާ ގޮތުން މަގުބޫލު އުޒުރެއް ނެތި ކިޔެވުން މެދުކަނޑާލައި ނުވަތަ ހުއްޓާލައިފި ނަމަ އެ ފަރާތަކަށް ދެވަނަ ފުރުޞަތެއް ދިނުމާއި ނުދިނުމުގެ އިހުތިޔާރު އަތޮޅު ކައުންސިލަށް އޮންނާނެ އެވެ.