ފުރާނަ އަކީ ވަރަށް އަގުހުރި އެއްޗެއް ކަމަށާއި މަގުމަތީގައި ދުއްވަން ވާނީ ރައްކާތެރިކަމާ އެކީ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މަގުމަތީގެ ސަލާމަތާއި ރައްކާތެރި ކަމަށް ހާއްސަކޮށްގެން ރާއްޖޭގެ މަޝްހޫރު އެނިމޭޓަރު އަދި "މާކަނާ" ގެ ޝޯގެ މޭސްތިރިޔާ ޔާމީން ރަޝީދުގެ ސެލްމިން އެނިމޭޝަނުން ގެނެސްދިން އެނިމޭޓެޑް ވީޑިއޯއެއް ސޯޝަލް މީޑިއާގައި ހިއްސާކުރައްވައި ރައީސް ވިދާޅުވީ މަގުތައް ރައްކާތެރި ތަނަކަށް ހެދޭނީ ހުރިހާ އެންމެން ގުޅިގެން މަސައްކަތްކޮށްގެން ކަމަށެވެ.
"އެހެންވެ ތިމާ އަމިއްލަ އަށް ހަދާ ގޯހެއް އިސްލާހު ކުރާކަށް ދެވަނަ ފުރުސަތެއް ވެސް ނުލިބިދާނެ." ހޭލުންތެރިކަން އުަފއްދަން ޔާމީންގެ ގެނެސްދިން ވީޑިއޯގެ މަސައްކަތަށް ޝުކުރު ވެސް އަދާކުރައްވަމުން ރައީސް ވިދާޅުވި އެވެ.
ރާއްޖެ އަކީ ނުރައްކާތެރި އެކްސިޑެންޓްތައް ހިނގުން ވަރަށް ގިނަ ގައުމެކެވެ. އެގޮތުން އާބާދީ ބޮޑެތި އަދި ވެހިކަލްތައް ގިނަ ސަރަހައްދުތަކުގައި ހިނގާ އެކްސިޑެންޓްތައް ވަރަށް ގިނަ އެވެ. އަދި ނުރައްކާތެރި އެކްސިޑެންޓްތަކުގައި މިހާތަނަށް ރާއްޖޭގެ އެކި ހިސާބުތަކުގައި އެތައް ބައެއްގެ ފުރާނަ ވެސް ގެއްލިފައިވެ އެވެ.
ފަހަކަށް އައިސް މާލެ އާއި ހުޅުމާލޭގައި އެކްސިޑެންޓްތައް ވަރަށް ބޮޑަށް އިތުރުވެފައިވާ އިރު، މި މަހުގެ ތެރޭގައި އެފަދަ ހާދިސާތަކުގައި ދެ ޒުވާނަކު މަރުވެފައިވެ އެވެ.
ފުލުހުން އަންނަނީ ތަކުރާރުކޮށް ގާނޫނާއި ގަވާއިދުތަކާ އެއްގޮތަށް ދުއްވަން އިލްތިމާސް ކުރަމުންނެވެ.