ގެ އާއި ބަދިގެ ތެރޭގައި ބޭނުންކުރާ ބައެއް ކަހަލަ އެއްޗެހި ރައްކާ ކުރަން އަޅާ ކޮންޓެއިނާ ތައްޔާރުކޮށް، ވިއްކާ އެމެރިކާގެ މަޝްހޫރު ކުންފުނި، "ޓަޕަވެއާ ބްރޭންޑްސް ކޯޕަރޭޝަން ބަނގުރޫޓްވެއްޖެ އެވެ.
އެ ކުންފުނިން ބަނގުރޫޓްވިކަން އިއުލާންކޮށް ބުނެފައި ވަނީ 2020 އިން ފެށިގެން ކުންފުނީގެ ވިޔަފާރި ވަރަށް ބޮޑަށް ދަށްވެ، މާލީ ވަރަށް ބޮޑެތި ތާށިތަކަކާ ކުރިމަތިލާން ޖެހިފައި އޮތް ކަމަށެވެ. މި ތާށިކަމާ ހެދި މިދިޔަ ޖޫން މަހުގެ ތެރޭގައި އެމެރިިކާގެ ފެކްޓްރީ ބަންދު ކުރަން ނިންމައި 150 އެއްހާ މުވައްޒަފުން ވެސް "ޓަޕަވެއާ" އިން ވަކިކޮށްފައިވެ އެވެ.
ކުންފުނި ބަނގުރޫޓްވި އިރު އެތަނުގެ ހަރުމުދަލުގެ އަގު އުޅެނީ 500 މިލިއަން ޑޮލަރާއި އެއް ބިލިއަން ޑޮލަރާ ދެމެދުގަ އެވެ. އަދި "ޓަޕަވެއާ" ގެ ލައިބިލިޓީ އުޅެނީ ބިލިއަނަކާއި 10 ބިލިއަން ޑޮލަރާ ދެމެދު އެވެ. މީގެ ތެރޭގައި ކުންފުނީގެ 700 މިލިއަން ޑޮލަރަށް ވުރެ ބޮޑު ދަރަންޏެއް ވެސް އެބައޮތެވެ.
ގަރުނެއްވާން ކައިރިވެފައި އޮތް ކުންފުނި ބަނގުރޫޓްވި އިރު، މުވައްޒަފުންގެ އަދަދު 10،000 އަށް ވުރެ ގިނަ އެވެ.
އެމެރިކާގެ ފްލޮރިޑާގައި ހެޑްކުއާޓަރު ހުންނަ "ޓަޕަވެއާ" ވުޖޫދަށް އައީ މީގެ 86 އަހަރު ކުރިން 1938 ގަ އެވެ. އެ ކުންފުނީގެ މިހާރުގެ ޗެއާމަނަކީ ސޫޒަން ކެމަރޮން އެވެ. އަދި ސީއީއޯ އަކީ ލައުރީ އޭން ގޯލްޑްމަނެވެ.