ކަލާސް ޓީވީގެ މަގުބޫލު ރިއަލިޓީ ޝޯ، "ބިގް ބޮސް" ގެ 18 ވަނަ ސީޒަން ވަރަށް އަވަހަށް އަންނާނެ ކަމަށް ބުނެ ޝޯގެ ޓައިޓްލް ޕްރޮމޯއެއް ދައްކާލައިފި އެވެ.
ބެލެވޭ ގޮތުން އަންނަ މި ޝޯ ޕްރީމިއާކުރާނީ އަންނަ މަހުގެ ތެރޭގަ އެވެ. ނަމަވެސް ކަލާސް އިން އަދި ސީދާ ވަކި ތާރީހެއް ހާމައެއް ނުކުރެ އެވެ. "ބިގް ބޮސް" އަކީ މަޝްހޫރު ތަރި ސަލްމާން ހޯސްޓްކުރާ ޝޯއެކެވެ. އަށާރަ ވަނަ ސީޒަން ވެސް ހޯސްޓްކުރާނީ އޭނަ އެވެ. ސަލްމާން މިހާރު އަންނަނީ އަންނަ އަހަރުގެ ފިތުރު އީދުގައި ރިލީޒްކުރަން ހަމަޖެހިފައިވާ ފިލްމު "ސިކަންދަރު" ގެ މަސައްކަތް ކުރަމުންނެވެ.
މީޑިއާތަކުން ބުނީ ސަލްމާނާ އެކީ ވަރަށް އަވަހަށް "ބިގް ބޮސް 18" ގެ ޕްރޮމޯއެއް ވެސް ގެނެސްދީ ޝޯގެ ޕްރީމިއާ ތާރީހު އިއުލާން ކުރާނެ ކަމަށެވެ.
މި އަހަރުގެ ޖެނުއަރީގައި ނިންމާލި "ބިގް ބޮސް 17" ކާމިޔާބުކުރީ ސްޓޭންޑަޕް ކޮމީޑިއަން މުނައްވަރު ފާރޫގީ އެވެ.
މި ޝޯގެ 18 ވަނަ ސީޒަން ގެނެސްދޭން ތައްޔާރުވަމުން އަންނަ އިރު، ޝޯގެ އޯޓީޓީ ވާޝަންގެ ތިން ވަނަ ސީޒަން ދާދި ފަހުން ނިންމައިލީ ޓީވީ ބަތަލާ ސަނާ މަކްބޫލު ޝޯ ކާމިޔާބުކޮށްގެންނެވެ. ޖިއޯ ސިނަމާ އިން ސްޓްރީމްކުރި އެ ސީޒަން ހޯސްޓްކުރީ އަނިލް ކަޕޫރެވެ.