ރައީސް ޑރ. މުހައްމަދު މުއިއްޒުގެ ނުފޫޒެއް ޕްރޮސެކިއުޓާ ޖެނެރަލް އައްބާސް ޝަރީފަށް ނޯންނާނެ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ހީނާ ވިދާޅުވީ މިނިވަން މުއައްސަސާތަކާއި އަދި މަގާމުތަކަށް އައްޔަން ކުރެވޭ ބޭފުޅުންނަކީ ވަރަށް މިނިވަންކަމާ އެކީ އެ ބޭފުޅުންގެ ދައުރު އަދާކުރެއްވޭނެ ބޭފުޅުން ކަމަށާއި އެކަމަކަށް ރައީސްގެ އެއްވެސް ކަހަލަ ނުފޫޒެއް ބާރެއް ނޯންނާނެ ކަމަށެވެ.
ޕީޖީ ކަމަށް މިއަދު އައްޔަން ކުރެވުނު އައްބާސް އަކީ އެންމެ އެކަށީގެންވާ އަދި ޕްރޮފެޝަނަލްކޮށް މަސައްކަތް ކުރެއްވޭނެ ބޭފުޅެއް ކަމަށްވެސް ހީނާ ވިދާޅުވި އެވެ.
"ޕީޖީގެ މަގާމުގައި އެމަނިކުފާނުގެ ރޯލު މިނިވަންކަމާއެކީގައި އަދި ޕްރޮފެޝަނަލީ ކުރެއްވުމުގެ ފުރުސަތު ލިބިގެންދާނެ،" ހީނާ ވިދާޅުވި އެވެ.
އައްބާސް ވަނީ 2011 އިން 2015 އަށް ހައިކޯޓުގެ ފަނޑިޔާރުކަން ކުރައްވާފަ އެވެ. އަދި މި ސަރުކާރުގައި ރައީސް އޮފީހުގެ ލީގަލް ސެކްރެޓަރީގެ މަގާމުވެސް ވަނީ އަދާކުރައްވާފަ އެވެ.
ޕްރޮސިކިއުޓާ ޖެނެރަލްގެ މަޤާމު ހުސްވެފައިވަނީ އެ މަގާމުގައި ހުންނެވި ހުސައިން ޝަމީމް އިސްތިއުފާ ދެއްވުމުންނެވެ.