ބޮލީވުޑްގެ މަޝްހޫރު ބަތަލާ ކަޕޫރްގެ ފިލްމީ ކެރިއަރަށް އަންނަ އަހަރު ރަސްމީކޮށް 25 އަހަރު ފުރޭތީ އެކަމާ ގުޅުވައިގެން އޭނަ އަށް ޓްރިބިއުޓެއްގެ ގޮތުން ބާއްވަން ހަމަޖެއްސި ފެސްޓިވަލް މާދަމާ ފަށަން ނިންމައިފި އެވެ.
ކަރީނާގެ ކެރިއަރުގެ އެންމެ ފާހަގަކޮށްލެވޭ ފިލްމުތަކަށް ހާއްސަކޮށްގެން ހަފުތާއަކަށް ދެމިގެންދާ ގޮތަށް މި ފެސްޓިވަލް އިންތިޒާމު ކުރަނީ މަލްޓިޕްލެކްސް ސިނަމާ ޗެއިން، ޕީވީއާރް އައިނޮކްސްއި ޕިކްޗާސްއިންނެވެ. އެގޮތުން އިންޑިއާގެ 15 ސިޓީއެއްގެ 30 ސިނަމާއެއްގައި މި މަހުގެ 27 އާ ހަމައަށް ކަރީނާގެ ހޮވާލެވިފައިވާ ފިލްމުތައް ދައްކާނެ އެވެ.
ފެސްޓިވަލްގައި ދައްކަން ހަމަޖެހިފައިވާ ފިލްމުތަކުގެ ތެރޭގައި ހިމެނެނީ ޑައިރެކްޓަރު ކަރަން ޖޯހަރު 2001 ގައި ގެނެސްދިން "ކަބީ ހުޝީ ކަބީ ޢަމް" އާއި އެ އަހަރު ޑައިރެކްޓަރު ސަންތޯޝް ސިވަން ގެނެސްދިން "އަސޯކާ" އާއި ސުދީރު މިޝްރާ ޑައިރެކްޓްކުރި 2003 ގެ "ޗަމޭލީ" އާއި ޑައިރެކްޓަރު ވިޝާލް ބަރަދްވާޖްގެ 2006 ގެ "އޯމްކާރާ" ގެ އިތުރުން ޑައިރެކްޓަރު އިމްތިއާޒް އަލީގެ 2007 ގެ "ޖަބް ވީ މެޓް" އެވެ.
ކަރީނާގެ ފިލްމު ފެސްޓިވަލާ ގުޅޭ ގޮތުން އިއްޔެ ބޭއްވި މީޑިއާ އިވެންޓްގައި 43 އަހަރުގެ ބަތަލާ ބުނީ އޭނަގެ ފިލްމުތަކަށް ހާއްސަކޮށްގެން ފެސްޓިވަލެއް ބޭއްވުމަކީ ވަރަށް ބޮޑޔ ޝަރަފެއް ކަމަށާއި އެކަމާ ވަރަށް ފަހުރުވެރި ވެސް ވާ ކަމަށެވެ. ކަރީނާ ބުނީ މި ފެސްޓިވަލް ބާއްވަން ނިންމިކަން އެނގުމާ އެކީ ފިރިމީހާ ސައިފް އަލީ ޚާން ވަނީ ފެސްޓިވަލްގައި ދައްކާ ހުރިހާ ފިލްމެއް ބަލަން ދާނެ ކަމަށް ބުނެފައި ކަމަށެވެ.
"މިކަމާ ސައިފް ވަރަށް އުފަލުން ހުރީ." އޭނަ ބުންޏެވެ.
ހިންދީ ސިނަމާގެ އެންމެ ނުފޫޒު ގަދަ ކަޕޫރް ޚާންދާނަށް ނިސްބަތްވާ ކަރީނާގެ ފުރަތަމަ ފިލްމަކީ ޑައިރެކްޓަރު ޖޭޕީ ދައްތާ 2000 ވަނަ އަހަރު ގެނެސްދިން "ރެފިއުޖީ" އެވެ. ކަރީނާގެ އެންމެ ފަހުގެ ފިލްމަކީ މި މަހުގެ 13 ގައި ރިލީޒްކުރި ކްރައިމް ތުރިލާ "ދަ ބަކިމްހަމް މާޑާސް" އެވެ.
ކުރީގެ ބަތަލާ ކަރިޝްމާ ކަޕޫރްގެ ކޮއްކޮ ދެން އެންމެ އަވަހަށް ޝޫޓިން ފަށާނީ ޑައިރެކްޓަރު މެގްނާ ގުލްޒާރުގެ "ދާއިރާ" ކަމަށް މީޑިއާތަކުން ބުނެ އެވެ. އޭގެ ޝޫޓިން ފަށަން ޕްލޭންކޮށްފައި އޮތީ ނޮވެމްބަރު މަހުގެ ތެރޭގަ އެވެ.