އައްޑޫ ހިތަދޫން ދޫކުރަން ނިންމި ގޯތިތަކުގެ ތެރެއިން އިތުރު ގޯތިތަކެއް، ލިބުނު މީހުންނާ އިއްޔެ ހަވާލުކޮށްފި އެވެ.
ހިތަދޫ އަވަށު އޮފީހުން ބުނީ އިއްޔެ ހަވާލުކުރި ގޯތިތަކަކީ ހިތަދޫ ފްލެޓް ސަރަހައްދުގެ ބިންތައް ރީޕްލޭންކޮށްގެން އެ ސަރަހައްދުން ދޫކުރަން ކަނޑައެޅި ގޯތިތައް ކަމަށެވެ. ހިތަދޫން 500 ގޯތި ދޫކޮށްފައިވާ އިރު، އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ހިމެނޭ މާމެންދޫ ސަރަހައްދުން މި އަހަރުގެ މެދުތެރޭގައި ގޯތިތަކެއް ހަވާލުކޮށްފައިވެ އެވެ.
ހިތަދުއާ އެކީ އައްޑޫގެ އިތުރުން ތިން އަވަށަކުން ޖުމްލަ 1،000 ގޯއްޗަށް އައްޑޫ ސިޓީ ކައުންސިލުން ހުޅުވީ މިދިޔަ އަހަރުގެ ޖެނުއަރީ މަހުގެ ތެރޭގަ އެވެ. އެގޮތުން ފޭދޫން 300، މީދޫން 100 އަދި ހުޅުދޫން 100 ގޯތި ދޫކުރަން ނިންމި އެވެ. ފޭދު އާއި ހިތަދޫން 1،500 އަކަފޫޓްގެ ގޯތި ދޫކުރަން ނިންމި އިރު، ހުޅުމީދޫން ދޫކުރަން ނިންމީ 2،000 އަކަފޫޓްގެ ގޯއްޗެވެ.
ގޯތި ދޫކުރަން ނިންމި ހުރިހާ އަވަށެއްގައި ވެސް ގޯތިތައް ހަވާލުކުރުމުގެ މަސައްކަތް އޮތީ ފަށައިފަ އެވެ.