ރާއްޖޭގެ ރަށްރަށުގެ ޙާލަތާއި ރައްޔިތުންނަށް ލިބޭ އުފާވެރިކަން މިންކުރާނެ ގޮތް ދެނެގަނެ އެ ކަންކަން ކުރިއަރުވާ، ރައްޔިތުންގެ އުފާވެރިކަމާއި ތަރައްޤީއާއި ގުޅުވައިލުމަށް ޓަކައި "މޯލްޑިވްސް ހެޕިނެސް އިންޑެކްސް" އެކުލަވައިލުމުގެ އަތޮޅުތެރޭގެ ފުރަތަމަ މަސައްކަތު ބައްދަލުވުން އދ. ހަންޏާމީދޫގައި ބާއްވައިފި އެވެ.
އަންގާރަ ދުވަހުގެ ރޭ ބޭއްވި މި ބައްދަލުވުމުގެ މައިގަނޑު ބޭނުމަކީ ދިވެހިރާއްޖޭގެ އުފާވެރިކަމުގެ މިންގަނޑު ނުވަތަ މޯލްޑިވްސް ހެޕިނެސް އިންޑެކްސް މިންކުރުމަށް އެކުލަވައިލެވޭ އޮނިގަނޑު ނުވަތަ ފްރޭމްވޯކަކީ ފުޅާ ދާއިރާއެއްގައި ރާއްޖޭގެ ގިނަ ފަރާތްތަކަކާ މަޝްވަރާކުރެވިގެން، އެކުލަވައިލެވޭ އޮނިގަނޑެއްގެ ތެރެއިން ރަށްރަށުގެ ޙާލަތާއި އުފާވެރިކަން ރަނގަޅަށް އެނގޭނެ ގޮތަކަށް ތައްޔާރުކުރެވޭ ފުރޭމްވޯކަކަށް ހެދުމެވެ.
އިސްލާމިކް ޔުނިވަސިޓީގެ ސެންޓަ ފޯ ޕޯސްޓްގްރެޖްއޭޓް ސްޓަޑީސްގެ ޑީން ޑރ. ފާޠިމަތު މުނާ ކުރިއަށް ގެންދެވި މަސައްކަތު ބައްދަލުވުމުގައި ހަންޏާމީދޫ ކައުންސިލުގެ މެންބަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެންބަރުންނާއި، ހަންޏާމީދޫ ކައުންސިލުގެ މުވައްޒަފުންނާއި އަދި އިސްރަށްވެހިންނާއެކު ޖުމްލަ 43 ފަރާތަކުން ބައިވެރިވި އެވެ.
އިދާރީ ދާއިރާތަކާ ބެހޭ މިނިސްޓްރީން ކުރިއަށް ގެންދާ ހެޕިނެސް އިންޑެކްސްގެ މަސައްކަތް ރަސްމީކޮށް ފެށީ ޖުލައި މަހުގެ ތެރޭގަ އެވެ.
ހެޕިނެސް އިންޑެކްސްގައި ބަލާ ދާއިރާތައް:
1. ނަފުސުގެ ނުވަތަ ނަފުސާނީ ދުޅަހެޔޮކަން
2. ޖިސްމުގެ ނުވަތަ ޖިސްމާނީ ދުޅަ ހެޔޮކަން
3. ދިރިއުޅުމުގެ އެންމެހައި ދާއިރާތަކަށް ވަގުތު ދެވޭ މިންވަރު
4. ކަންކަން ދަސްކުރުމަށާއި، ފަންނުވެރިކަމާއި، ޘަޤާފީ ކަންކަން ކުރުމަށް ފުރުޞަތުލިބުން.
5. މުޖުތަމައުގެ ގުޅުން ނުވަތަ އެއްބައިވަންތަކަން
6. އިޖުތިމާޢީ އެހީތެރިކަން
7. ތިމާވެށްޓާ ގުޅުން އޮންނަ މިންވަރު
8. ސަރުކާރާ މެދު ދެކޭ ގޮތް
9. ދިރިއުޅުމުގެ ފެންވަރު
10. ކުރާ މަސައްކަތްތަކަށް ހިތްހަމަޖެހުން ލިބޭ މިންވަރު
މިކަމާ ގުޅޭ ދިރާސާ ހަ މަހެއްހާ ދުވަހުގެ ތެރޭގައި ނިންމާލަން އަމާޒު ހިފާފައިވާ އިރު، ހެޕިނެސް އިންޑެކްސްގެ ކަނޑައެޅުމުގެ މަސައްކަތް އަންނަ އަހަރު ތަންފީޒު ކުރެވޭނެތޯ މަސައްކަތްކުރާނެ ކަމަށް މިނިސްޓްރީން ބުނެފައިވެ އެވެ.