ޑާކް ރެއިން އެންޓަޓައިންމަންޓުން އަންނަ މަހު ގެނެސްދޭ ފިލްމު "ބިބީ" ގެ ކެރެކްޓާތަކުގެ ޕޯސްޓަރުތަކެއް ދައްކާލައިފި އެވެ.
ވަކިވަކިން ދައްކައިލި ޕޯސްޓަރުތަކުގައި ކާސްޓްގައި ހިމެނޭ އެކި ފަންނާނުން ކުޅެފައިވާ ކެރެކްޓާތަކުގެ ނަންތައް ވެސް ހިމަނާފައިވެ އެެވެ.
ހޮރޯ-ކޮމެޑީއެއްގެ ގޮތުގައި ގެނެސްދޭ "ބިބީ" އަކީ އާ ޑައިރެކްޓަރު ޝަހުދާ މަހުމޫދު ލިޔެ، ޑައިރެކްޓްކޮށްފައިވާ ފިލްމެކެވެ.
މި ފިލްމުގެ ލީޑް ތަރިންނަކީ އޭނަގެ ފިރިމީހާ ޝަރަފު އަބްދުﷲ އާއި މަރިޔަމް (މަޖުދާ) މަޖޫ އެވެ. "ބިބީ" ގައި ޝަރަފުގެ ކެރެކްޓާގެ ނަމަކީ ޒިޔަން އެވެ. މަޖޫ އަކީ ޖަންނަތެވެ.
އަންނަ މަހުގެ 7 ގައި ޕްރީމިއަ ކުރަން ހަމަޖެހިފައިވާ ފިލްމުގެ އިތުރު ކާސްޓުންގެ ތެރޭގައި ޝީލާ ނަޖީބު، އަހުމަދު ސައީދު، އަބްދުﷲ ޝާފިއު (ފުބޫ)، އަހުމަދު ޝާކިރު (ޝާއްކޮ އައްމަޑޭ)، މަލީހާ ވަހީދު، ޝުހާ، އާދަމް ރިޒްވީ، ސާމީ، އަމަން ހާޒިފު އަދި މަރިޔަމް ހަލީމް ހިމެނެ އެވެ.
"ބިބީ" ގެ ޓިކެޓް އޮލިމްޕަހުން މިހާރު ވިއްކަމުން އަންނަ އިރު، މިއީ ޑާކް ރެއިނުން މި އަހަރު ގެނެސްދޭ ދެވަނަ ފިލްމެވެ.
އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ މާޗްގައި ގެނެސްދިން ރިވެންޖް އެކްޝަން ތުރިލާ "ފުރޭތަ" އެވެ.