ރާއްޖޭގެ މަސްދޯނިފަހަރާއ މަސްވެރިން ދަފުތަރު ކުރަން ފިޝަރީޒް މިނިސްޓްރީން ފަށާފައި އޮތް މަސައްކަތުގެ ތެރެއިން މިހާރު ރާއްޖޭގެ އެންމެ ދެކުނުން އައްޑޫ ސިޓީގެ 83 މަސްދޯނި ދަފުތަރުކޮށްފައިވާ ކަމަށް މިނިސްޓްރީން ބުނެފި އެވެ.
ކުރިން މިދިޔަ ޖުލައި މަހަށް މި ގައުމީ ދަފުތަރު އެކުލަވާލުމުގެ މަސައްކަތް ނިންމަން މިނިސްޓްރީން އަމާޒު ހިފި ނަމަވެސް މި މަސައްކަތް ދިގުލައިގެން ގޮސްފައިވާތީ މިހާރު އަމާޒު ހިފާފައި އޮތީ އަންނަ މަސް ނިމުމުގެ ކުރިން ދަފުތަރުގެ މަސައްކަތް ނިންމާށެވެ. އެހެންވެ މަސައްކަތް އަވަސް ކުރުމުގެ ގޮތުން ފިޝަރީޒް މިނިސްޓްރީގެ ޓީމުތަކެއް އަންނަނީ ރާއްޖެ އެކި ހިސާބުތަކުގައި ހަރަކާތްތެރިވަމުންނެވެ.
މަސްވެރިންގެ ދަފުތަރުގައި ރަޖިސްޓްރީވުން ފަސޭހަކުރުމަށްޓަކައި "ކެޔޮޅު" ގެ ނަމުގައި ޕޯޓަލްއެއް ވެސް ހަފާދައިވެ އެވެ. އެހެންވެ އެ ޕޯޓަލް ވެސް މެދުކޮށް ރަޖިސްޓްރޭޝަން އަވަސްކުރަން މިނިސްޓްރީން އެދިފައިވެ އެވެ.
މިނިސްޓްރީން ބުނި ގޮތުގައި މަސްވެރިކަމުގެ ލައިސަންސް ދެން އާކޮށްދޭ އިރު ވެސް ދަފުތަރުގައި ރަޖިސްޓްރީވެފައިވާތޯ ބަލާނެ އެވެ.
މަސްވެރިންގެ ގައުމީ ދަފުތަރު އިފުތިތާހުކުރީ މި އަހަރުގެ ފެބްރުއަރީ މަހު ށ. ކޮމަންޑޫގައި ބޭއްވި ހަފުލާއެއްގަ އެވެ.
މަސްވެރިންގެ ދަފުތަރެއް އެކުލަވައިލުމުގެ ބޭނުމަކީ މަސްވެރިން ބޭންކިން ނިޒާމުގެ ތެރެއަށް ވެއްދުމަށާއި، ތަފާތު އެކިއެކި ބޭނުންތަކަށް މަސްވެރިންނަށް އަމާޒުކޮށް ލޯނު ދޫކުރުމަށާއި މަސްވެރިންނަށް ދަޢުލަތުން ފޯރުކޮށް ދިނުމަށް ބޭނުންވާ އިޖުތިމާޢީ ރައްކާތެރިކަމާއި ސަބްސިޑީ ފަދަ ވަސީލަތްތައް ސީދާ މަސްވެރިންނަށް ފޯރުކޮށް ދެވޭނެ އިންތިޒާމެއް ހަމަޖެއްސުމަށް މަގުފަހި ކުރުން ކަމަށް ސަރުކާރުން ބުނެފައިވެ އެވެ.