ރާއްޖޭގައި އަލަށް ބާއްވާ އިމާމުންގެ މަހާސިންތާ އަންނަ ހޮނިހިރު ދުވަހު ބާއްވަން ނިންމައިފި އެވެ.
އިއްޔެ ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ މަހާސިންތާގައި ފިކުރީ ގޮތުން އިސްލާމީ މުޖުތަމަޢަށް ކުރިމަތިވާ ގޮންޖެހުންތަކާއި މުޖުތަމަޢުގައި އިމާމުން ދައުރާއި އިސްލާމީ އުންމަތް ބިނާކުރުމުގައި މިސްކިތުގެ ދައުރުގެ މައްޗަށް އަލިއަޅުވާލައި އިމާމުން ތަމްރީންކުރެވޭނެ ކަމަށެވެ.
"އިސްލާމް ދީނުގައި މިސްކިތްތަކަކީ ދީނީ އުންމަތެއް ބިނާކުރުމުގައި މުހިންމު ދައުރެއް އަދާކުރާ މުއައްސަސާއެއް،" މިނިސްޓަރު ވިދާޅުވި އެވެ. "މިކަންކަން އިމާމުންނަށް އެނގެންޖެހޭތީވެ، މިކަމާ ބެހޭ ގޮތުން މަހާސިންތާގައި މަޢުލޫމާތު ދެވޭނެ."
އިމާމުންގެ މަހާސިންތާގައި އޮންނަލައިންކޮށާއި ހާޒިރުވެގެން 388 އިމާމުން ބައިވެރިވާނެ އެވެ.
މި ސަރުކާރު އައި ފަހުން އިމާމުންގެ ފެންވަރު މަތިކުރަން ތަފާތު ޕްރޮޮގްރާމްތައް އަންނަނީ ހިންގަމުންނެވެ. އެގޮތުން ރާއްޖެއިން ބޭރަށް ފޮނުވައިގެން ވެސް މިހާތަނަށް 60 އިމާމުން ތަމްރީންކޮށްފައިވެ އެވެ. އަމާޒަކީ މި އަހަރު ނިމުމުގެ ކުރިން 100 އިމާމުން ބޭރަށް ފޮނުވައިގެން ތަމްރީން ކުރުމެވެ. އަދި އަތޮޅުތަކުގައި ވެސް އަންނަނީ އިމާމުން ތާޒާ ކުރުމުގެ ޕްރޮގްރާމްތަކެއް ހިންގަމުންނެވެ.
މީގެ އިތުރުން މިޞްރުގެ އަލް-އަޒްހަރު ޔުނިވަރސިޓީއާ ގުޅިގެން އިމާމުންނަށް ޢަރަބި ބަސް ދަސްކޮށް ދިނުމުގެ ކޯސްތަކެއް އަންނަނީ ހިންގަމުންނެވެ.
އިސްލާމިކް މިނިސްޓްރީން މި އަހަރު ބާއްވަން ނިންމި މަހާސިންތާތަކުގެ ތެރެއިން މި މަހުގެ 15 ގައި ވަނީ ދީނީ އަދި އިޖުމާއީ ޖަމިއްޔާތަކުގެ މަހާސިންތާ ވެސް ބާއްވައިފަ އެވެ. އަދި މިދިޔަ މަހުގެ ތެރޭގައި ދީނީ އިލްމުވެރިންގެ މަހާސިންތާއެއް ވެސް ބާއްވާފައިވެ އެވެ.