އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް ފިޔަވަޅު އަޅައިދިނުމަށް އެދި ދީނީ އިލްމުވެރިޔާ ޑރ. މުހައްމަދު މުހައްމަދު އިޔާޒު، ރައީސް ޑރ. މުހައްމަދު މުއިއްޒަށް ސިޓީއެއް ފޮނުވައިފި އެވެ.
ރައީސް މުއިއްޒަށް އިޔާޒު ފޮނުއްވި ސިޓީގައި ވިދާޅުވީ އިއްޔެ ރައީސް އޮފީހުގައި އިސްލާމިކް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޝަހީމް ދައުލަތުގެ ނިޝާން ޖެހި ޕޯޑިއަމްގައި ހުންނަވައިގެން ދެމަފިރިއެއްގެ ދިރިއުޅުމުގެ ތެރެއަށް ވަދެވަޑައިގަތްކަމަށް ބެލެވޭ ވާހަކަތަކެއް ދައްކަވާފައިވާ ކަމަށެވެ.
މިފަދަ އަމަލަކީ މިނިސްޓަރެއްގެ ހައިސިއްޔަތުން ކުރެއްވުން އެކަށީގެންނުވާ، އަދި އިސްލާމީ އަޚްލާޤާއި ދިވެހި މުޖުތަމަޢުގެ އާދަކާދައާ ހިލާފު ކަމެއް ކަމަށް އިޔާޒު ވިދާޅުވި އެވެ.
އިޔާޒު ވިދާޅުވީ ޤައުމީ ނިޝާންޖެހި ޕޯޑިއަމެއްގައި ވާހަކަފުޅު ދައްކަވަން ކޮންމެ ބޭފުޅަކަށްވެސް ލިބިވަޑައިގަންނަވަނީ ރަސްމީ ހައިސިއްޔަތަކުން ރަސްމީ ވާހަކަފުޅު ދެއްކެވުމަށް ކަމަށެވެ. ޝަހީމްގެ އެ އަމަލަކީ އެންޓި ކޮރަޕްޝަން ކޮމިޝަނުން ތަހުޤީޤް ކުރަންޖެހޭ ބާވަތުގެ މައްސަލައެއް ކަމަށްވެސް ވިދާޅުވި އެވެ. އަދި މުސްތަޤްބަލުގައިވެސް މިފަދަ އަމަލުތައް ތަކުރާރުވިޔަ ނުދިނުމަށްޓަކައި މިނިސްޓަރުގެ މައްޗަށް އެކަށީގެންވާ ފިޔަވަޅު އަޅުއްވައި ދެއްވުމަށް އިޔާޒު ވަނީ އެދިވަޑައިގެންފަ އެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ޝަހީމް ވަނީ ޑރ. އިޔާޒުގެ އަނބިކަނބަލުން އޭނާއަށް ކޮންޓްރޯލު ނުވާ ވާހަކަ އާއި "ބަސްނާހާ" ވާހަކަ މީހުންގެ ގާތުގައި އިޔާޒު ދައްކަމުންދާ ކަމަށެވެ. ނަމަވެސް އިޔާޒުގެ ގާތުގައި އަނބިކަނބަލުން ވަރިކުރަން ބުނެފައި ނުވާނެ ކަމަށް ތަކުރާރުކޮށް ޝަހީމް ވިދާޅުވި އެވެ.