މޯލްޑިވްސް އޯޝަން ޕްލާސްޓިކް އެލައަންސް އިން ވޭސްޓް މެނޭޖްމަންޓް ކޯޕަރޭޝަން އަށް ކުނި މެނޭޖްކުރުމަށް ބޭނުންވާ މުހިންމު އާލާތްތަކެއް ރަސްމީކޮށް ހަވާލުކޮށްފި އެވެ.
މިއަދު ބޭއްވުނު ރަސްމިއްޔާތުގައި ވެހިކަލްތަކާއި، ބޭލަރތަކާއި، ކުނި އަޅާ ބިންތަކާއި އަދި ނެޓް ބޭގްތައް ވެމްކޯއާ ހަވާލުކޮށްފައިވެ އެވެ.
އެންވަޔަރަމެންޓް މިނިސްޓްރީން ބުނީ މި އާލާތްތަކަކީ ސަސްޓެއިނަބަލް އައިލެންޑް ވޭސްޓް މެނޭޖްމަންޓް އެންޑް ރީސައިކްލިންގ އިނީޝިއޭޓިވްގެ ދަށުން ހޯދާފައިވާ ތަކެތި ކަމަށެވެ. މި މަޝްރޫޢުއަކީ ކޯކާ-ކޯލާ ފައުންޑޭޝަންގެ އެހީތެރިކަމާއެކު ކުރިއަށް ގެންދެވޭ މަޝްރޫޢުއެކެވެ.
މި މަޝްރޫޢުގެ މައިގަނޑު މަޤްޞަދަކީ ދެމެހެއްޓެނިވި ގޮތެއްގައި ކުނި މެނޭޖްކުރުމާއި، ތިމާވެށި ރައްކާތެރިކުރުމަށް މަސައްކަތްކުރުން ކަމަށާއި މިފަދަ މުހިންމު މަސައްކަތްތައް ކުރުމުގައި އެކި ފަރާތްތަކުގެ މެދުގައި އޮންނަ ގުޅުމުގެ މުހިންމުކަން ވެސް މި މަޝްރޫޢުއިން ފާހަގަކޮށްދޭ ކަމަށް މިނިސްޓްރީން މައުލޫމާތުދެ އެވެ.
މި ރަސްމިއްޔާތުގައި ސަރުކާރުގެ އިސް ބޭފުޅުންނާއި، ވެމްކޯގެ އިސްވެރިންނާއި އަދި ކޯކާ-ކޯލާ ފައުންޑޭޝަންގެ ބޭފުޅުން ބައިވެރިވެ ވަޑައިގެންނެވި އެވެ.