އައްޑޫން އަލަށް ހިއްކި ބިންތަކުގެ ލޭންޑްޔޫޒް ޕްލޭންތައް ފާސްކުރަން ރައްޔިތުންގެ ހިޔާލު ހޯދަން ތައްޔާރުވެއްޖެ އެވެ.
ޑްރާފްޓް ޕްލޭންތައް އެކުލަވާލާފައި ވަނީ ބިން ހިއްކި އަވަށްތަކުގެ ރައްޔިތުންނާ ވެސް ބައްދަލުކޮށް ހިޔާލާއި މަޝްވަރާ ހޯދުމަށް ފަހު އެވެ. އެގޮތުން ޑްރާފްޓް ޕްލޭންތައް އެކުލަވާލާފައި ވަނީ ޝެރެޓް ސްޓޫޑިއޯއާ ގުޅިގެން ކަމަށް އައްޑޫ ސިޓީ ކައުންސިލުން ބުންޏެވެ.
އެގޮތުން ޕްލޭންތައް ފާސްކުރުމުގެ ކުރިން ރައްޔިތުންގެ ހިޔާލު ހޯދަން ބާއްވާ ފުރަތަމަ ބައްދަލުވުން މިރޭ ހާއްސަކޮށްފައި ވަނީ ހިތަދުއަށެވެ. އައްޑޫ ހައި ސްކޫލްގައި އެ ބައްދަލުވުން ފަށާނީ މިރޭ 8:30 ގަ އެވެ. އެހެންވެ އާންމުންނަށް ބައްދަލުވުމަށް ކައުންސިލުން ދައުވަތު ވެސް އަރުވަ އެވެ.
މަރަދޫ ލޭންޑްޔޫޒް ޕްލޭނާ ގުޅޭ ބައްދަލުވުން އޮންނާނީ މާދަމާ ހަވީރު 4:30 ގައި އިރުޝާދިއްޔާ ސްކޫލްގަ އެވެ. އަދި މަރަދޫފޭދޫ ޕްލޭނާ ބައްދަލުން އޮންނާނީ މާދަމާ ރޭ 8:30 އިރުޝާދިއްޔާ ސްކޫލްގަ އެވެ.
އައްޑޫގައި 2022 ގައި ބިން ހިއްކަން ކުރިއަށް ގެންދިޔަ ބިޔަ މަޝްރޫއުގެ ތެރެއިން ޖުމްލަ 236.5 ހެކްޓަރުގެ ބިން ހިއްކާފައިވެ އެވެ. މީގެ ތެރޭގައި ޓޫރިޒަމަށް ހާއްސަކޮށްގެން ހިއްކި ތިން ރަށެއް ވެސް ހިމެނެ އެވެ.
އައްޑޫ ބިން ހިއްކުމުގެ މަޝްރޫއު ކުރިއަށް ގެންދިޔައީ ނެދަލޭންޑްސްގެ ވެން އޫޑްއާ ހަވާލުކޮށްގެންނެވެ.