ސްރީ ލަންކާ އަށް ނިސްބަތްވާ އިންޑިއާގެ މަޝްހޫރު ބަތަލާ ޖެކްލީން ފެނާންޑޭޒް މުހިއްމު ރޯލެއް ކުޅެފައިވާ ހޮލީވުޑްގެ ފިލްމު "ކިލް ދެމް އޯލް 2" އަންނަ ހަފުތާގައި ރިލީޒްކުރަން ނިންމައި، ފިލްމުގެ ޓްރެއިލާ ވެސް ދައްކާލައިފި އެވެ.
މި މަހުގެ 24 ގައި ސިނަމާތަކަށް ގެންނަން ތާވަލުކޮށްފައިވާ މި އެކްޝަން ފިލްމުގައި ޖެކްލީން ކުޅެފައި ވަނީ ވަނެސާ ކިޔާ ކެރެކްޓާއެކެވެ. އޭނަ ކުރިން ވެސް އިންޓަނޭޝަނަލް ބައެއް ޕްރޮޖެކްޓްތަކުގައި މަސައްކަތްކޮށްފައިވެ އެވެ.
ކުރިން "ބްލެޓްސް އޮފް ޖަސްޓިސް" އާއި "ރޯންގް ޓާން 6: ލާސްޓް ރިޒޯޓް" ގެ އިތުރުން ރީ-ކިލް" ގެނެސްދިން ވިލެރީ މިލޭވް ޑައިރެކްޓްކޮށްފައިވާ "ކިލް ދެމް އޯލް 2" ގެ ބަތަލަކީ މަޝްހޫރު އެކްޝަން ތަރި، ވެން ޑެމް އެވެ. ފިލްމުގެ އިތުރު ކާސްޓުންގެ ތެރޭގައި ޕީޓީ ސްޓޯމެއާ އާއި މަރާޔާ ކޮންޗިޓާ އަލޮންސޯ ހިމެނެ އެވެ.
ހޮލީވުޑްގެ ފިލްމަކުން ޖެކްލީން ބެލުންތެރިންނާ ބައްދަލުކުރަން ތައްޔާރުވާ އިރު، އޭނަގެ އެންމެ ފަހުގެ ބޮލީވުޑްގެ ފިލްމަކީ މިދިޔަ އަހަރުގެ "ސެލްފީ" އެވެ. "ކިކް" އާއި "ރޭސް 2" އާއި "ހައުސްފުލް" ފްރެންޗައިޒް ފަދަ ކާމިޔާބު ފިލްމުތައް ކުޅެފައިވާ ބަތަލާގެ ކުރިއަށް ހުރި ފިލްމުތަކުގެ ތެރޭގައި "ފަތޭ" އާއި "ވެލްކަމް ޓު ޖަންގަލް" ހިމެނެ އެވެ.