ބަންކަރިން ހިދުމަތާއެކު ރާއްޖެއަށް ބޮޑު ބަދަލެއް އަންނާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
އިހަވަންދިއްޕޮޅުގައި ބަންކަރިން ހިދުމަތް ފެށުމަށް މިއަދު ބޭއްވި ރަސްމިއްޔާތުގައި ވާހަކަދައްކަމުން ސައީދު ވިދާޅުވީ ބަންކަރިން ހިދުމަތާއެކު އިހަވަންދިއްޕޮޅުގެ ސަރަހައްދު ހުޅުވާލެވިގެން މިދިޔައީ ބައިނަލްއަގުވާމީ ބޮޑު ވިޔަފާރިއަކަށް ކަމަށާއި މި ހިދުމަތް ރާއްޖޭގައި އެންމެ ހަޔެއްކަ މަސް ދުވަހުގެ ތެރޭގައި އެސްޓީއޯ އިން ފެށީ ދުނިޔޭގެ މި މަސައްކަތް ކުރާ އެންމެ ވަރުގަދަ އެއް ކުންފުންޏާއެކު ކަމަށެވެ.
ރައީސް ޑރ. މުހައްމަދު މުއިއްޒުގެ ވިސްނުންފުޅު ހުންނެވީ މި މަސައްކަތް ރާއްޖޭގައި ފެށުމަށްފަހު އިތުރަށް ފުޅާކުރުން ކަމަށްވާއިރު، ކުރީގެ ވެރީން އެކި ތަންތަނުގައި ތިއްބަވައިގެން މިކަމާ ދޭތެރޭ ރައްޔިތުންގެ ހިތްތަކުގައި ޝައްކު އުފައްދަން މަސައްކަތް ކުރުމަކީ ގައުމިއްޔަތާއި ދެކޮޅު ވާހަކައެއް ކަމަށް ސައީދު ވިދާޅުވި އެވެ.
މި ސަރުކާރު ވެރިކަމާ ހަވާލުވިއިރު ރާއްޖެ އޮތީ 122 ބިލިއަން ރުފިޔާގެ ދަރަންޏެއްގައި ކަމަށާއި، ރާއްޖޭގެ މާލީ ހާލަތު ބަދަލުކުރަން ހަމައެކަނި ޓޫރިޒަމަށް ބަރޯސާވުމަކީ ރިސްކެއް ކަމަށް ބައިނަލްއަގުވާމީ ފަރާތްތަކުން ވެސް ބުނާއިރު، އެހެން ދާއިރާތަކަށް އިގްތިސާދީ ކަންތައްތައް ފުޅާކުރަންޖެހެނީ އެހެންވެގެން ކަމަށް ސައީދު ވިދާޅުވި އެވެ. އެގޮތުން 6 މަސް ދުވަހުގެ ތެރޭގައި ސަރުކާރުން މި ފެށީ އެ މަސައްކަތް ކަމަށްވެސް އޭނާ ވިދާޅުވި އެވެ.
"އިރާދަކުރެވިއްޔާ މީގެ ސަބަބުން ބޮޑު ބަދަލެއް މި ސަރަހައްދަށް އަދި މި ރާއްޖެ އަށް އަންނާނެ،" ސައީދު ވިދާޅުވި އެވެ.
ބަންކަރިން ހިދުމަތުން ރާއްޖެ އަށް ވަރަށް އަވަހަށް ކުރިއެރުން ލިބޭނެ ކަމަށާއި މިއީ ގައުމު ބިނާކުރަން އެންމެން އެކީ ތެދުވާންޖެހޭ ވަގުތު ކަމަށްވެސް ސައީދު ވިދާޅުވި އެވެ.
އިހަވަންދިއްޕޮޅުގައި ބަންކަރިން ހިދުމަތް ފަށާފައިވަނީ އެސްޓީއޯ އާއި އެމްޕީއެލް ގުޅިގެންނެވެ. ބަންކަރިންގެ ހިދުމަތަށް ހާއްސަ އޮފީސް އިމާރާތް ހުންނާނީ ހއ. އުލިގަމުގަ އެވެ.
ރާއްޖޭގެ އުތުރުގައި ބަންކަރިން ހިދުމަތަށް ދެ ބޯޓް އެސްޓީއޯ އިން ގެނެސްފައިވެ އެވެ. އެއީ ގާތްގަނޑަކަށް 4،000 ޓަނުގެ ތެޔޮ އުފުލޭ "މެރިން ބެއްލާ" އާއި "މެރިން އެންޖެލް" އެވެެ.
ބަންކަރިންގެ ހިދުމަތާ އެކު އިންޓަނޭޝަނަލް ކަސްޓަމަރުންނަށް، އިތުރު 14 ހިދުމަތެއް އެމްޕީއެލްގެ ފަރާތުން ފޯރުކޮށްދިނުމަށް ވަނީ ހަމަޖެހިފަ އެވެ. އެމްޕީއެލް އިން ވަނީ މި ހިދުތަމަށް 24 ގަޑިއިރުގެ ކޯލް ސެންޓަރެއް ވެސް ގާއިމުކޮށްފަ އެވެ.