ލުބުނާނުގެ ހިޒްބުﷲ އިން މުއާމަލާތު ކުރަން ގެންގުޅޭ ޕޭޖަރުތައް ގޮއްވާލައިގެން އިޒްރޭލުން ދިން ހަމަލާއާ ގުޅިގެން އެގައުމަށް ހަރުކަށި އަދަބެއް ދޭނެ ކަމުގެ އިންޒާރު ހިޒްބުﷲ ޖަމާއަތުގެ ވެރިޔާ ހަސަން ނަސްރުﷲ ދެއްވައިފި އެވެ.
ހިޒްބުﷲ ގެ މެންބަރުންގެ ޕޭޖަރުތައް ގޮވުމުގެ ހާދިސާތައް ފާއިތުވި ދެ ދުވަހު ހިނގާފައިވާއިރު، ހިޒްބުﷲ އިން ވަނީ މިއީ އިޒްރޭލުން ދުރާލައި ރާވައިގެން ދީފައިވާ ހަމަލާއެއް ކަމަށް ތުހުމަތުކޮށްފަ އެވެ. މި ހަމަލާތަކުގައި 37 މީހަކު މަރުވެފައިވާއިރު، 287 މީހަކު ތިބީ ސީރިއަސް ހާލަތުގަ އެވެ. މި ހަމަލާތަކާ ގުޅިގެން އިޒްރޭލުން ވަކި އެއްޗެއް މިހާތަނަށް ބުނެފައެއް ނުވެ އެވެ.
މި ހަމަލާތަކާ ގުޅިގެން ޓީވީ މެދުވެރިކޮށް ހިޒްބުﷲ ގެ ވެރިޔާ ނަސްރުﷲ ދެއްވި ހިތާބެއްގައި ވިދާޅުވީ އިޒްރޭލުން ހޮސްޕިޓަލުތަކާއި، ފިހާރަތަކާއި، ގެތަކަށް ހަމަލާތައް ދިނުމުން އެގައުމުން މިހާރު ހުރިހާ ރަތް ރޮނގެއް ހުރަސްކޮށްފައިވާ ކަމަށާއި އިޒްރޭލުން ފާއިތުވި ދެ ދުވަހު ލުބްނާނުގައި ހިންގީ ބޮޑު ގަތުލްއާންމެއް ކަމަށެވެ.
މިއީ ހިޒްބުﷲ ޖަމާއަތަށް ކުރިމަތިވި ބޮޑު އިމްތިހާނެއް ކަމަށާއި ނަމަވެސް މި ހަމަލާއާއެކު ވެސް އެ ޖަމާއަތް ބަލިކަށިވެ ކުޑަކަކޫ މައްޗަށް ތިރި ނުކުރެވޭނެ ކަމަށް ނަސްރުﷲ ވިދާޅުވި އެވެ. އޭގެ ބަދަލުގައި އެ ޖަމާއަތް ދެން ވެސް ވާނީ އިތުރަށް ވަރުގަދަ ކަމަށާއި މި ހަމަލާތަކާ ގުޅިގެން ހީވެސް ނުކުރާފަދަ ގޮތަކަށް އިޒްރޭލަށް ހަރުކަށި އަދަބެއް ދޭނެ ކަމުގެ އިންޒާރު ވެސް ދެއްވި އެވެ.
އިޒްރޭލަށް އަދަބު ދޭނެ ގޮތުގެ ތަފްސީލުތައް ހާމަނުކޮށް ނަސްރުﷲ ވަނީ އެގައުމަށް އަދަބު ދިނުމުން އެންމެންނަށް ވެސް އެކަން ފެނިގެންދާނެ ކަމަށް ވިދާޅުވެފަ އެވެ. މި ހަމަލާތަކާއެކު ވެސް ފަލަސްތީނުގެ ގާޒާގެ ދިފާއުގައި ކުރަމުންދާ މަސައްކަތަށް މަޑުޖެހުމެއް ނާންނާނެ ކަމުގެ ޔަގީންކަން ވެސް އޭނާ ދެއްވި އެވެ.