ރާއްޖޭގައި މިހާރު ފްލޯޓިން ސޯލާ ޕެނެލް ހަރުކުރުމުގެ މަސައްކަތް ކުރިއަށްދާ ކަމަށް އެންވަޔަރަމަންޓް މިނިސްޓަރު ތާރިގް އިބްރާހިމް ވިދާޅުވެއްޖެ އެވެ.
ރައީސް އޮފީހުގައި އިއްޔެ އޮތް ބޭއްވި ނޫސްވެރިންގެ ބައްދަލުވުމުގައި އޭނަ ވިދާޅުވީ ރާއްޖޭގައި އިއާދަކުރަނިވި ހަކަތަ އުފައްދަން މީގެ ކުރިން ވެރިކަން ކުރެއްވި އެެއްވެސް ރައީސަކު މަސައްކަތް ނުކުރައްވާ ކަމަށާއި އެހެން ނަމަވެސް ރައީސް ޑރ. މުހައްމަދު މުއިއްޒު އިއާދަކުރަނިވި ހަކަތައިގެ މަސައްކަތްތަށް ގާތުން ބައްލަވައި އެކަމަށް އެއްބާރުލުން ދެއްވާ ކަމަށެވެ.
މިނިސްޓަރު ވިދާޅުވީ ކުރިއަށް އޮތް ދުވަސްތަކުގައި ރާއްޖޭގައި 33 ޕަސެންޓު ކަރަންޓު އުފައްދާނީ އިއާދަކުރަނިވި ހަކަތައިން ކަމަށެވެ.
"އިއާދަ ކުރަނިވި ހަކަތައިގެ މަޝްރޫއުގެ ދަށުން އަންނަ އޮކްޓޫބަރުގެ ނިޔަލަށް 700 ގޭގެ ސޯލާ ޔުުނިޓު ރާއްޖެ ގެނެވޭ. ރާއްޖެ އަކީ ބިން ކުޑަ ތަނަކަށް ވުމުން އަޅުގަނޑުމެން މިހާރު ވާނީ ފްލޯޓިން ސޯލާ ޕެނެލް ހަރުކުރުމުގެ މަސައްކަތް ފަށާފައި،" ތާރިގް ވިދާޅުވި އެވެ. "އެގޮތުން އައްޑޫ ސިޓިގައި 10 މެގަވޯޓުގެ ފުލޯޓިން ސޯލާ ގާއިމުކުރުމަށް އަދި މާލެ ސަރަހައްދުގައި 100 މެގަވޮޓުގެ ސޯލާ ހަރުކުރުމަށް އަޅުގަނޑުމެން ވާނީ އިއުލާންކޮށްފައި."
ރާއްޖޭގައި އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން ކަރަންޓު އުފެއްދުން އިތުރުކުރުމަށްޓަކައި އޭޝިއަން ޑިވެލޮޕްމަންޓް ބޭންކް (އޭޑީބީ) އާ ގުޅިގެން 75.5 މިލިއަން އެމެރިކާ ޑޮލަރުގެ މަޝްރޫއެއްގެ އެއްބަސްވުމުގައި ޑިސެންބަރު 12، 2023 ގައި ސޮއިކޮށްފައިވެ އެވެ.