ރާއްޖޭގައި ހުރި ބައެއް އެމްބަސީތައް ކައިރީގައި އަޑުއުފުލާ ފުލުހުންގެ ވާޖިބު އަދާކުރުމަށް ހުރަސްއެޅި މައްސަލައިގައި ޑރ. މުހައްމަދު އިޔާޒުގެ އަނބިކަނބަލުން އާއިޝަތު ޝާދިޔާ ހައްޔަރުކޮށް ބަންދުކުރި މައްސަލަ ހައިކޯޓުގައި އިސްތިއުނާފު ކޮށްފިއެވެ.
އެމްބަސީތައް ކައިރީގައި އަޑުއުފުލި މައްސަލައިގައި ހައްޔަރު ކޮށްފައިވަނީ ޑރ. މުހައްމަދު އިޔާޒުގެ އަނބިކަނބަލުން އާއިޝަތު ޝާދިޔާ އާއި ޑރ. ޝަޒްރާ އިބްރާހީމެވެ. މި ދެމީހުން ހައްޔަރު ކޮށްފައިވަނީ އޮގަސްޓް 28 ވަނަ ދުވަހުއެވެެ. މި ދެމީހުންގެ ބަންދު މުއްދަތު ދެ ފަހަރެއްގެ މަތިން ކްރިމިނަލް ކޯޓުން ޖެހިއިރު ބަންދުން ދޫކޮށްލީ ޝަރުތު ކުރުމަށްފަހުއެވެ.
މި މައްސަލައިގައި ޝާދިޔާ ބަންދު ކުރަން ކްރިމިނަލް ކޯޓުން އަމުރު ކުރި މައްސަލަ އޭނާގެ ފަރާތުން ހައިކޯޓުގައި ވަނީ އިސްތިއުނާފު ކޮށްފައެވެ. އެހެންނަމަވެސް އެ އިސްތިއުނާފު ބަލައިގަތުމާމެދު ހައިކޯޓުން އަދި ވަކިގޮތެއް ނުނިންމައެވެ.
ފުލުހުން މީގެކުރިން މި މައްސަލައާ ގުޅިގެން ބުނެފައިވަނީ، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފަށް، އާއިޝަތު ޝާދިޔާ އާއި ޑރ. ޝަޒްރާ އިބްރާހީމް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ އަޑުގަދަކުރާ ބޭނުންކޮށްގެން ހަޅޭލެވުމާއި ބޭއަދަބީ ބަހުރުވައިން މުއާމަލާތްކޮށް ޑިޕްލޮމެޓިކް މިޝަންތަކުގެ މަސައްކަތަށް ހުރަސް އެޅޭގޮތަށް އަމަލުކުރުމުގެ އިތުރުން ވަކި ސަފީރަކަށް އުނދަގޫ ކުރުމުގެ އަމަލުތަކެއް ހިންގަމުން ގެންދިއުމާ ގުޅިގެން، އެސަރަހައްދުން ދިއުމަށް ފުލުހުން އެންގުމުންވެސް އެކަމަށްވެސް އިންކާރުކޮށް ފުލުހުންގެ ވާޖިބު އަދދާކުރުމަށް ހުރަސްއަޅާފައިވާ ކަމަށެވެ. ފުލުހުން ބުނެފައިވަނީ މި މީހުން ހައްޔަރު ކުރުމުގެ ކުރިން މި އަމަލުތައް ތަކުރާރު ނުކުރުމަށް އެމީހުންނަށް ތަކުރާރުކޮށް ނަސޭހަތްދީފައިވާ ކަމަށެވެ.