ސްރީ ލަންކާގެ ރިޔާސީ އިންތިހާބު މިއަދު ފަށައިފި އެވެ.
ޖުމްލަ 38 ކެންޑިޑޭޓަކު ވާދަކުރާ މި އިންތިހާބުގެ ވޯޓްލުން ފެށީ ލަންކާ ގަޑިން ހެނދުނު 7:00 ގަ އެވެ. ސަލާމަތީ ގިނަ ފިޔަވަޅުތަކަކާ އެކީ އިންތިހާބުގެ ވޯޓްލުން ފެށި އިރު ވޯޓްލުން ހަވީރު 4:00 އާ ހަމައަށް ކުރިއަށް ދާނެ ކަމަށް އެ ގައުމުުގެ އިލެކްޝަން ކޮމިޝަނުން ބުންޏެވެ.
ވޯޓްލާން 17 މިލިއަނަށް ވުރެ ގިނަ މީހުން ރަޖިސްޓްރީކޮށްފައިވާ އިރު، ވޯޓްލާން 13،134 ޕޯލިން ސްޓޭޝަން ގާއިމުކޮށްފައިވެ އެވެ.
މި ފަހަރުގެ އިންތިހާބުގައި ގިނަ އަދަދެއްގެ ކެންޑިޑޭޓުން ވާދަކުރާ އިރު، މީގެ ތެރޭގައި މިހާރުގެ ރައީސް ރަނިލް ވިކްރަމަސިންހަ ވެސް ހިމެނެ އެވެ.
މީޑިއާތަކުން ބުނެފައިވާ ގޮތުގައި އިންތިހާބުގައި ވާދަވެރިކަން އެންމެ ބޮޑީ ތިން ކެންޑިޑޭޓެއްގެ މެދުގަ އެވެ. އެއީ ޔުނައިޓެޑް ނެޝަނަލް ޕާޓީ (އެންޔޫޕީ) އަށް ނިސްބަތްވާ ރަނިލް އާއި ސަމާގީ ޖަނާ ބަޓަވެގަޔާ (އެސްޖޭބީ) ގެ ކެންޑިޑޭޓް ސަޖިތު ޕްރަމަސާދާގެ އިތުރުން ޖަނާތާ ވިމުކްތީ ޕެރަމޫނާ (ޖޭވީޕީ) ގެ ކެންޑިޑޭޓް އަރޫނާ ކުމާރަ ޑިސަނަޔަކަ އެވެ.
އިންތިހާބުގެ ވޯޓްލުން ނިންމުމަށް ފަހު މިރޭ ނަތީޖާ އިއުލާން ކުރަން ފަށާނެ އެވެ.