މާލެސިޓީގެ މަގުތަކުގައި ހުރި ބާ ވަހިކަލްތައް ނެގުމުގެ މަސައްކަތް މާލެސިޓީ ކައުންސިލުން ފަށައިފިއެވެ.
މިއަދު ހެނދުނު މި މަސައްކަތް ފަށާފައިވާއިރު، މާލެ ސިޓީ ކައުންސިލުން ބުނެފައިވަނީ ބާ ވެހިކަލްތައް ނެގުމުގެ މަސައްކަތް ކުރަމުން ގެންދަނީ ފުލުހުންނާއި ގުޅިގެން ކަމަށެވެ.
އެގޮތުން ހަލާކުވެފައިހުރި ވެހިކަލްތަކާއި ގިނަ ދުވަސްވަންދެން ނުދުއްވާ ބަހައްޓާފައިހުރި ވެހިކަލްތައް ނެގުމުގެ މަސައްކަތް ދަނީ ކުރަމުންނެވެ.
މާލެސިޓީ ކައުންސިލްގެ އިތުރު ބައެއް އިތުރު އިދާރާތަކުންވެސް މިއަދު ގެންދަނީ ފުލުހުންނާއި ގުޅިގެން މަގުތަކުގައި ހުރި ބާވެހިކަލްތައް ނެގުމުގެ މަސައްކަތް ކުރަމުންނެވެ. އެގޮތުން ކައުންސިލްތަކުގެ މިނިސްޓްރީއާއި ފުލުހުންނާއި ގުޅިގެންވެސް މިއަދު ވަނީ މިމަސައްކަތް ކުރިއަށް ގެންގޮސްފައެވެ.
މާލޭގެ މަގުތަކުގައި ގަވައިދާ ހިލާފަށް ޕާކުކޮށްފައި ހުންނަ ވެހިކަލްތަކާއި ހަލާކުވެ، ނުދުއްވާ ގިނަ ދުވަސްވެފައިވާ ވެހިކަލްތައް ނެގުމުގެ މަސައްކަތް ފުލުހުން މިހާރުވެސް އަންނަނީ ކުރަމުންނެވެ. އަދި މިގޮތަށް ނަގާ ވެހިކަލްތަކާ ހަވާލުވުމަށް އޮންނަ މުއްދަތުގައި ހަވާޅު ނުވެއްޖެނަމަ ނައްތާލުމުގެ މަސައްކަތްވެސް ފުލުހުން އަންނަނީ ކުރަމުންނެވެ.