އ.ދ ގެ އާންމު މަޖިލީހުގެ 79 ވަނަ ސެޝަންގައި ބައިވެރިވެވަޑައިގަތުމަށްޓަކައި، ރައީސް ޑރ. މުޙައްމަދު މުޢިއްޒު ކުރައްވާ ދަތުރުފުޅުގައި އެމަނިކުފާނު ގެންދަވަނީ ރާއްޖެ ފަހުރުވެރިކޮށްދެމުން ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފު އުމަރު ވިދާޅުވެއްޖެ އެވެ.
ރައީސް މުއިއްޒު އިއްޔެ އެމެރިކާ އަށް ވަޑައިގެން ވަނީ އދ.ގެ އާންމު ބައްދަލުވުމުގެ ޖަލްސާގެ ހަވާސާގައި އޮތް ތަރައްގީވަމުން އަންނަ ކުދި ޖަޒީރާ ދައުލަތްތައް (ސިޑްސް)ގެ ބައްދަލުވުމެއްގައި ބައިވެރިވެވަޑައިގެންފަ އެވެ.
އާދަމް ޝަރީފް "އެކްސް"ގައި ކުރެއްވި ޕޯސްޓެއްގައި ވިދާޅުވީ އ.ދ ގެ އާންމު މަޖިލީހުގެ ޖަލްސާގައި ބައިވެރިވެވަޑައިގަތުމަށް ރައީސް މުއިއްޒު ކުރައްވާ ދަތުރުފުޅުގައި އެމަނިކުފާނު ގެންދަވަނީ ދިވެހި ގައުމު ފަހުރުވެރިވާ މިންވަރަށް ރާއްޖެ ތަމްސީލުކޮށްދެއްވައި ދިވެހިންގެ އަޑު އުފުލަމުން ކަމަށެވެ. ދިވެހިންގެ އިހުސާސްތަކާއި ވިންދާއި އެއްގޮތަށް، ދިވެހި ގައުމު އިސްކުރެއްވުމުގެ ސަބަބުން ރައީސް މުއިއްޒަށް އޮންނަ އިތުބާރާއި ޔަގީންކަން އެތައް ގުނައަކުން އިތުރުވާ ކަމަށްވެސް ވިދާޅުވި އެވެ.
އަދި ރައީސް މުއިއްޒުގެ ތަގުރީރުތަކުގެ އެންމެ ހާއްސަ އެއް ކަމަކީ ގައުމިއްޔަތު ބިނާކުރެއްވުމަށް ދެއްވާ ސަމާލުކަމާއި އަހައްމިއްޔަތުކަން ކަމަށްވެސް އާދަމް ޝަރީފް ވިދާޅުވި އެވެ.
ރައީސް އޮފީހުން ބުނިގޮތުގައި އާންމު މަޖިލީހުގެ 79 ވަނަ ސެޝަންގައި ރައީސް ތަޤުރީރުކުރައްވާނީ އަންގާރަ ދުވަހު އެވެ.
މި ދަތުރުފުޅުގައި އެކި ދައުލަތްތަކާއި ޤައުމުތަކުގެ އިސް ވެރިންނާ ބައްދަލުކުރައްވައި ބައިލެޓަރަލް އަދި މަލްޓިލެޓަރަލް މަޝްވަރާތައް ރައީސް ކުރިއަށްގެންދަވާނެ އެވެ.
މިއީ ރައީސް މުޢިއްޒު އދގެ އާންމު މަޖިލީހުގައި ބައިވެރިވަޑައިގަންނަވާ ފުރަތަމަ ފަހަރެވެ.