އަންނަ ނޮވެމްބަރު 17 ގެ ކުރީން ތިން މިސްކިތެއްގެ މަސައްކަތް ނިންމަން އަމާޒު ހިފާފައިވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެ އެވެ.
މިދިޔަ ހަފުތާގައި ރައީސް އޮފީހުގައި ނޫސްވެރީންނާ ބައްދަލު ކުރައްވައި މިނިސްޓަރު ވިދާޅުވީ، މިހާރު ކުރިއަށްދާ 22 މިސްކިތް ޢިމާރާތްކުރުމުގެ މަޝްރޫޢުތަކުގެ ތެރެއިން ތިން މިސްކިތެއްގެ މަސައްކަތް ނޮވެމްބަރު 17 ގެ ކުރީން ނިންމޭ ވަރަށް މަސައްކަތްތައް ކުރިއަށް ދާކަމަށެވެ.
އެ ތިން މިސްކިތަކީ އދ. ދިގުރަށުގައި އިމާރާތް ކުރަމުން އަންނަ މިސްކިތާއި ނ. މަނަދޫގައި އިމާރާތް ކުރަމުން އަންނަ މިސްކިތުގެ އިތުރުން ހދ. ހިރިމަރަދޫގައި އިމާރާތް ކުރަމުން އަންނަ މިސްކިތެވެ.
މިނިސްޓްރީން ބުނީ އެތަނުގެ ބެލުމުގެ ދަށުން 22 މިސްކިތެއްގެ މަސައްކަތް ކުރިއަށްދާ އިރު، މިސްކިތްތަކުގެ މަސައްކަތްތައް ހަލުވިކުރުމަށްޓަކައި ގާތުން ގިނަ މަސައްކަތްތަކެއް ކުރަމުން އަންނަ ކަމަށެވެ.
ތިން މިސްކިތެއް ނޮވެމްބަރު 17 ގެ ކުރިން ނިންމަން މިނިސްޓްރީން އަމާޒު ހިފި އިރު، އެ ތާރީހަކީ ރައީސް ޑރ. މުހައްމަދުގެ ވެރިކަމަށް އަހަރު ފުރޭ ދުވަހެވެ.