އައްޑޫ ހިތަދޫ ބޭރުމައްޗާއި ރަސްގެދަރަ ދާއިރާގައި އައުޓްޑޯ ޖިމެއް ހަދަން ނިންމާފައިވާތީ އެކަމަށް ބޭނުންވާ ސާމާނު ސަޕްލައިކޮށް ޖިމް ގާއިމުކުރުމުގެ މަސައްކަތްކޮށް ދޭނެ ބަޔަކު ހޯދަން ސްޕޯޓްސް މިނިސްޓްރީން ހުޅުވާލައިފި އެވެ.
އެ މިނިސްޓްރީން ވަނީ މިކަމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 2 ހަމައަށް ހުޅުވާލައިފަ އެވެ. ހިތަދޫގެ އިތުރުން އެހެން ދެ ރަށެއްގައި ވެސް އައުޓްޑޯ ޖިމް ގާއިމު ކުރަން ހަމަޖެހިފައިވެ އެވެ. އެއީ ގދ. ވާދު އާއި ހއ. ދިއްދޫގަ އެވެ.
ހިތަދޫގައި އައުޓްޑޯ ޖިމްތަކެއް ހަދަން ނިންމި އިރު، 2022 ގައި ވެސް އެ އަވަށުގައި އައުޓްޑޯ ޖިމެއް ހަދައި ހުޅުވާފައީވެ އެވެ. އަދިމީގެ އަހަރުތަކެއް ކުރިން އައްޑޫގެ ހުރިހާ އަވަށްތަކެއްގައި ވެސް އައުޓްޑޯ ޖިމްތަކެއް ގާއިމުކޮށްފައިވެ އެވެ. ނަމަވެސް އެފަދަ ގިނަ ތަންތަނަށް ރަނގަޅަށް ބެލެހެއްޓެމުން ނުދާތީ ބައެއް ޖިމްތައް ވަނީ އެއްކޮށް ވީރާނާވެފަ އެވެ.