ބޮލީވުޑްގެ ތަރި ޓައިގާ ޝްރޮފްގެ "ބާގީ" ފްރެންޗައިޒްގެ ހަތަރު ވަނަ ބައިގެ ޝޫޓިން ނޮވެމްބަރު މަހުގެ ތެރޭގައި ފަށަން ނިންމާފައިވާ އިރު، އޭގެ ޑައިރެކްޓަރަކީ ކަންނާޑާ ޑައިރެކްޓަރު ހާޝާ ކަމަށް ރިޕޯޓްތައް ބުނެފި އެވެ.
ނަމަވެސް އެ ފިލްމު ޕްރޮޑިއުސްކުރާ ނަދިއަދުވާލާ ގްރޭންޑްސަން އިން އެކަން އަދި ކަށަވަރުކޮށް ދީފައެއް ނުވެ އެވެ.
ބޮލީވުޑް ހަންގާމާ އިން ބުނީ "ބާގީ 4" އަށް ހާޝާ ހަމަޖެއްސީ ކުރީގެ ދެ ބަޔާ ވީހާ ވެސް ބޮޑަށް ފިލްމު ތަފާތުކޮށް، މުޅިން އާ ވިސްނުމެއްގެ ޑައިރެކްޓަރެއްގެ ތަސައްވުރާ އެކީ ފިލްމު ހަދަން ކަމަށެވެ. އެގޮތުން އާ ފިލްމު ވާނީ ކުރީގެ ތިން ފިލްމަށް ވުރެ ވަރުގަދަ އެކްޝަން ފިލްމަކަށް ކަމަށް ހަންގާމާ އިން ބުންޏެވެ.
އުމުރުން މިހާރު 44 އަހަރުގެ ހާޝާގެ އެންމެ ފަހުގެ ފިލްމަކީ މި އަހަރުގެ މާޗްގައި ގެނެސްދިން އެކްޝަން ފެންޓަސީ ތުރިލާ "ބީމާ" އެވެ. މިއީ ހާޝާގެ ފުރަތަމަ ތެލެގޫ ފިލްމެވެ. އޭނަ ގެނެސްދިން ފިލްމުތަކުގެ ތެރޭގައި 2022 ގެ "ވޭދާ" އާއި 2021 ގެ "ބަޖަރަންގީ 2" އާއި 2017 ގެ "އަންޖާނީ ޕުުތުރާ" ގެ އިތުރުން 2012 ގެ "ޗިންގާރީ" ހިމެނެ އެވެ.
ޓައިގާގެ "ބާގީ" ގެ ފުރަތަމަ ފިލްމު 2016 ގައި ގެނެސްދިނީ ސަބީރް ޚާން ޑައިރެކްޓްކޮށެވެ. އަދި 2018 ގެ "ބާގީ 2" އާއި 2020 ގެ "ބާގީ 3" ޑައިރެކްޓްކުރީ އަހުމަދު ޚާނެވެ.
"ބާގީ 4" އަށް ތައްޔާރުވަމުން ދިޔަ ނަމަވެސް ފިލްމުގެ ބަތަލާ އަކީ ކާކު ކަމެއް އަދި ނޭނގެ އެވެ.