ސްރީލަންކާގައި އިއްޔެ ބޭއްވި ރިޔާސީ އިންތިޚާބުގައި އެއްވެސް ކެންޑިޑޭޓަކަށް 50 ޕަސެންޓަށް ވުރެ ގިނަ ވޯޓު ނުލިބުމުން، ދެވަނަ ފަހަރަށް ވޯޓު ގުނަން ނިންމައިފި އެވެ.
މިއީ ލަންކާގެ ތާރީހުގައި ވެސް ރިޔާސީ އިންތިހާބެއްގައި ދެވަނަ ފަހަރަށް ވޯޓު ގުނަން ޖެހުނު ފުރަތަމަ ފަހަރެވެ.
އިންތިހާބުގައި މިހާތަނަށް އާންމުކޮށްފައިވާ ނަތީޖާތަކަށް ބަލާއިރު އެންމެ ގިނަ ވޯޓު ހޯދާފައިވަނީ ޕީޕަލަސް ލިބަރޭޝަން ޕާޓީ (ޖޭވީޕީ)ގެ ލީޑަރު އަނޫރާ ޑިސަނަޔަކަ އެވެ. އޭނާ އަށް ވަނީ 39.45 ޕަސެންޓު ވޯޓު ލިބިފަ އެވެ. އޭނާއާ އެންމެ ގާތުން ވާދަކުރައްވާ އެގައުމުގެ އިދިކޮޅު ލީޑަރު ސަޖިތު ޕްރަމަދާސައަށް ލިބިފައި ވަނީ 34.32 ޕަސެންޓް ވޯޓެވެ.
ދެވަނަ ފަހަރަށް ވޯޓު ގުނާއިރު ހަމައެކަނި ބަލާނީ ޑިސަނަޔަކަ އާއި ޕްރަމަދާސައަށް ވޯޓު ދީފައިވާ މިންވަރަށެވެ. އެހެން ހުރިހާ ކެންޑިޑޭޓުންގެ ނަންތައް މިހާރު ވަނީ ބާތިލުކޮށްފަ އެވެ.
ލަންކާގައި ރިޔާސީ އިންތިޚާބުގައި ވޯޓުލުން ކުރިއަށްދިޔައިރު، އާންމުންނަށް ވަނީ އެންމެ ކަމުދާ ތިން ކެންޑިޑޭޓުން ހިޔާރުކުރަން ފުރުސަތު ދީފަ އެވެ. އެގޮތުން ދެވަނަ ފަހަރަށް ވޯޓު ގުނާއިރު ބަލާނީ އާންމުން ދެވަނަ އަދި ތިންވަނަ އަށް ޑިސަނަޔަކަ އަދި ސަޖިތު ހިޔާރުކޮށްފައިވާ މިންވަރަށެވެ.
މި އިންތިހާބުގައި 17 މިލިއަން މީހުންނަށް ވޯޓުލުމުގެ ހައްގު ލިބިފައިވާއިރު، ގާތްގަނޑަކަށް 75 ޕަސެންޓް މީހުން މި އިންތިހާބުގައި ވޯޓުލާފައިވާ ކަމަށް ލަންކާގެ އިލެކްޝަންސް ކޮމިޝަނުން ބުނެ އެވެ.