ސްރީލަންކާގައި އިއްޔެ ބޭއްވި ރިޔާސީ އިންތިހާބުގެ ވޯޓު ދެވަނަ ފަހަރަށް ގުނުމުން، ޕީޕަލަސް ލިބަރޭޝަން ޕާޓީ (ޖޭވީޕީ)ގެ ލީޑަރު އަނޫރާ ޑިސަނަޔަކަ އިންތިހާބު ކާމިޔާބު ކުރައްވައިފި އެވެ.
ދެވަނަ ފަހަރަށް ވޯޓު ގުނަން ޖެހުނީ ފުރަތަމަ ފަހަރަށް ވޯޓު ގުނައިގެން އެއްވެސް ކެންޑިޑޭޓަކަށް 50 ޕަސެންޓަށް ވުރެ އިތުރަށް ވޯޓު ނުލިބުމާ ގުޅިގެންނެވެ. ފުރަތަމަ ފަހަރަށް ވޯޓު ގުނުމުން އެންމެ ގިނަ ވޯޓު ހޯއްދެވީ ޑިސަނަޔަކަ އާއި އެގައުމުގެ އިދިކޮޅު ލީޑަރު ސަޖިތް ޕްރަމަދާސަ އެވެ.
ލަންކާގައި ރިޔާސީ އިންތިޚާބުގައި ވޯޓުލުން ކުރިއަށްދިޔައިރު، އާންމުންނަށް ވަނީ އެންމެ ކަމުދާ ތިން ކެންޑިޑޭޓުން ހިޔާރުކުރަން ފުރުސަތު ދީފަ އެވެ. އެގޮތުން ދެވަނަ ފަހަރަށް ވޯޓު ގުނިއިރު ބަލާފައިވަނީ އާންމުން ދެވަނަ އަދި ތިންވަނަ އަށް ޑިސަނަޔަކަ އަދި ސަޖިތު ހިޔާރުކޮށްފައިވާ މިންވަރަށެވެ.
ސްރީލަންކާގެ އިލެކްޝަންސް ކޮމިޝަނުން މިރޭ ހާމަކުރި ގޮތުގައި ދެވަނަ ފަހަރަށް ވޯޓު ގުނުމުން ޑިސަނަޔަކަ ވަނީ އިންތިހާބު ކާމިޔާބުކުރައްވާފަ އެވެ. ނަމަވެސް އޭނާ އަށް ލިބިވަޑައިގެންނެވި ވޯޓުގެ ތަފްސީލެއް ހާމަކޮށްފައެއް ނުވެ އެވެ.
ލަންކާގެ ރައީސް ކަމުގެ ހުވާ ޑިސަނަޔަކަ މާދަމާ ކުރައްވާނެ ކަމަށް މީޑިއާ ރިޕޯޓުތައް ބުނެ އެވެ.
މި އިންތިހާބުގައި 17 މިލިއަން މީހުންނަށް ވޯޓުލުމުގެ ހައްގު ލިބިފައިވާއިރު، ގާތްގަނޑަކަށް 75 ޕަސެންޓް މީހުން މި އިންތިހާބުގައި ވޯޓުލާފައިވާ ކަމަށް ލަންކާގެ އިލެކްޝަންސް ކޮމިޝަނުން ބުނެ އެވެ.
ޑިސަނަޔަކަ ވެގެން ގޮސްފައިވަނީ ލަންކާގެ ރައީސްކަމަށް އިންތިހާބުވި 9 ވަނަ ފަރާތަށެވެ.