ބޭންކް އޮފް މޯލްޑިވްސް (ބީއެމްއެލް) ގެ ސީއީއޯގެ މަގާމަށް ކުރިމަތިލާން ހުޅުވާލައިފި އެވެ.
ގައުމީ ބޭންކަށް ސީއީއޯއަކު ހޯދަން އިއުލާންކޮށްފައި ވަނީ އެ މަގާމުގައި އެންމެ ފަހުން ހުންނެވި ކާލް ސްޓުމްކް މި މަހުގެ 8 ގައި އިސްތިއުފާ ދެއްވުމާ ގުޅިގެންނެވެ. އޭނަ އިސްތިއުފާ ދެއްވ ބީއެމްއެލް އިން "މާލީ ބަޢާވަތެއް" ގެންނަން އުޅުނު ކަމަށް ތުހުމަތުކޮށް އެ މައްސަލަ ބަލަން ފަށާފައި ވަނިކޮށް، ރާއްޖެ ދޫކުރައްވައި ދުބާއީ އަށް ވަޑައުގިތުމަށް ފަހު އެވެ.
ކާލް ބީއެމްއެލްގެ ސީއީއޯއަކަށް އައްޔަންކުރީ އޮކްޓޯބަރު 23، 2022 ގަ އެވެ.
އޭނަ އިސްތިއުފާ ދެއްވުމާ ގުޅިގެން ބީއެމްއެލް ހިންގެވުމުގެ ޒިންމާ ވަގުތީ ގޮތުން ނަންގަވަމުން ގެންދަވަނީ ޑެޕިއުޓީ ސީއީއޯ އައިޝަތު ނޫރައްދީނެވެ.
ބީއެމްއެލް އަށް އާ ސީއީއޯ އަކު ހޯދަން އިއުލާންކުރި އިރު، އެ ބޭންކް ގެ ޑިރެކްޓަރުންގެ ބޯޑަށް މެންބަރުން ހޮވައި އާ ބޯޑު ވަނީ އެކުލަވާލައިފަ އެވެ. އެގޮތުން ބީއެމްއެލްގެ ޗެއާޕާސަނަކަށް އައްޔަންކޮށްފައި ވަނީ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ކެބިނެޓް އެފެއާޒްގެ މަގާމުގައި ހުންނެވި އަހުމަދު އަލީ ހަބީބެވެ.
ބީއެމްއެލްގެ ސީއީއޯގެ މަގާމަށް އެޕްލައި ކުރުމުގެ ސުންގަޑި އަކީ އަންނަ މަހުގެ 7 އެވެ.