ސަލްމާން ޚާން ހޯސްޓްކުރާ ކަލާސް ޓީވީގެ ރިއަލިޓީ ޝޯ "ބިގް ބޮސް" ގެ 18 ވަނަ ސީޒަން ޕްރީމިއާކުރާ ތާރީހު އިއުލާންކޮށް، ޝޯގެ ފުރަތަމަ ޕްރޮމޯ ވެސް ދައްކާލައިފި އެވެ.
އާންމުންގެ މެދުގައި ވަރަށް މަގުބޫލު މި ޝޯގެ އާ ސީޒަން ޕްރީމިއާކުރަން ހަމަޖެހިފައި ވަނީ އަންނަ މަހުގެ 6 ވަނަ ދުވަހުގެ ރޭގަ އެވެ. އެއީ ރާއްޖެ ގަޑިން 8:30 ގަ އެވެ. "ބިގް ބޮސް 18" ގެ ތީމަކީ ވަގުތެވެ. އެހެންވެ މީގެ ޓެގް ލައިނަކީ "ޓައިމް ކާ ތަންޑާވް" އެވެ.
މި ޝޯ އަކީ އިންޑިއާގެ މަޝްހޫރު ސެލެބްރިޓީން ބައިވެރިކޮށްގެން ގެނެސްދޭ ޝޯއަކަށްވާތީ އާ ސީޒަނުން ވެސް މަޝްހޫރު މޫނުތަކެއް ފެންނާނެ އެވެ. ނަމަވެސް އެއީ ކޮންކޮން ސެލެބްރިޓީންނެއް ކަމެއް އަދި ކަށަވަރެއް ނުވެ އެވެ. ނަމަވެސް މީޑިއާތަކުގައި އަންނަނީ "ބިގް ބޮސް 18" އިން ފެންނާނެ ކަމަށް ބުނެ އެކިއެކި ސެލެބްރީޓީންގެ ވާހަކަ ގެނެސްދެމުންނެވެ.