ރަސްމާލެ މަޝްރޫއު އަވަސްކުރުމާ ގުޅޭގޮތުން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީންނާއި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން މިއަދު މަޝްވަރާކޮށްފި އެވެ.
މިނިސްޓްރީ އޮފް ކޮންސްޓްރަކްޝަންގައި ބޭއްވުނު މި ބައްދަލުވުމުގައި މިނިސްޓަރު ޑރ. މުއްޠަލިބްގެ އިތުރުން މިނިސްޓްރީގެ އިސް ވެރިންނާއި އެޗްޑީސީގެ އިސް ވެރިންވެސް ބައިވެރިވެ ވަޑައިގެންނެވި އެވެ.
މިނިސްޓްރީން ބުނީ މި ބައްދަލުވުމުގައި ރަސްމާލެ ޕްރޮޖެކްޓުގެ މިހާރުގެ ހާލަތާއި، ކުރިއަށް އޮތް ތަނުގައި މަސައްކަތްތައް ގެންދާނެ ގޮތުގެ ތަފްސީލީ މަޢުލޫމާތު ހިއްސާކުރެވުނު ކަމަށެވެ. އަދި މި މަޝްރޫޢުގެ މަސައްކަތް އަވަސް ކުރުމަށާއި، ފެންވަރު ރަނގަޅު ގޮތެއްގައި ނިންމުމަށް އަޅަންޖެހޭ ފިޔަވަޅުތަކާއި ގުޅޭގޮތުން ވެސް މަޝްވަރާކުރެވުނު ކަމަށް މިނިސްޓްރީން ބުނެ އެވެ.
މީގެއިތުރުން މި މަޝްރޫޢު ނިމުމުން ރައްޔިތުންނަށް ލިބިގެންދާނެ ފައިދާތަކާއި، މާލެ ސަރަޙައްދުގެ ތަރައްޤީއަށް މި މަޝްރޫޢުން ކުރާނެ އަސަރުތަކާ ގުޅޭގޮތުންވެސް މަޝްވަރާ ކުރެވުނު ކަމަށް މިނިސްޓްރީން މައުލޫމާތުދެ އެވެ.
މި ސަރުކާރުން ފައްޓަވާފައިވާ ބޯހިޔާވަހިކަމުގެ އެންމެ ބޮޑު މަޝްރޫއު ކަމަށްވާ ފުށިދިއްގަރުފަޅު ހިއްކައިގެން ތަރައްގީ ކުރާ "ރަސްމާލެ" މަޝްރޫއުއަކީ ގިނަ އަދަދެއްގެ ބޯހިޔާވަހިކަން ފޯރުކޮށްދިނުމަށް ރޭވިފައިވާ ބޮޑު ބިޔަ ޕްރޮޖެކްޓެކެވެ.