ޕީއެންސީއަށް މެމްބަރުން އިތުރުކުރަނީ ސަރުކާރުގެ ކުންފުނިތަކުގެ ބޭނުން ނަހަމަ ގޮތުގައި ހިފައިގެން ކަމަށް ސަރުކާރު ކޯލިޝަންގައި ހިމެނޭ މޯލްޑިވްސް ޑިވަލޮޕްމަންޓް އެލަޔަންސް (އެމްޑީއޭ)ގެ ނައިބު ލީޑަރު އަދި ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް "އެކްސް"ގައި ކުރެއްވި ޕޯސްޓެއްގައި ވިދާޅުވީ ސަރުކާރު ކުންފުނިތަކުގެ ވެރިން ކުންފުނިތަކުގެ ބޭނުން ނަހަމަ ގޮތުގައި ހިފައިގެން ކުންފުނިތަކަށް ބިލްކުރާ ގޮތަށް ޕާޓީއަށް މެމްބަރުން އިތުރުކުރުމަށް ދަތުރު ކުރުމަކީ ރައްޔިތުންގެ ފައިސާއަށް ގައްދާރުވުން ކަމަށެވެ.
"އަތޮޅުތަކުގެ ރަށްތަކަށް ކުރައްވާ ދަތުރުގެ ފޮޓޯތަކުން އެކަން ހާމަވޭ. ރޯމާ ދުވާލު ރައްޔިތުންގެ ފައިސާއިން ވައްކަން ކުރުން ހުއްޓާލަންޖެހޭ،" ވަކި ޕާޓީއެއްގެ ނަން ނުގެނެސް އައްބާސް ވިދާޅުވި އެވެ.
އައްބާސް މިހެން ވިދާޅުވި އިރު ޕީއެންސީން އަންނަނީ އެ ޕާޓީ އަށް މެމްބަރުން އިތުރުކުރުމަށް ރާއްޖޭގެ އެކި ހިސާބުތަކުގައި ހަރަކާތްތައް ހިންގަމުންނެވެ. މި ހަރަކާތްތަކުގައި ވަޒީރުންނާއި، ރައްޔިތުންގެ މަޖިލީހުގެ މެމްބަރުންގެ އިތުރުން ސަރުކާރު އެކި ކުންފުނިތަކުގެ އިސްވެރިން ވެސް އަންނަނީ ބައިވެރިވަމުންނެވެ.
ޕީއެންސީގެ އަމާޒަކީ ސަރުކާރަށް އެއް އަހަރު ފުރޭއިރު އެ ޕާޓީގެ މެމްބަރުންގެ އަދަދު 75،000 އަށް އެރުވުމެވެ.
އިލެކްޝަންސް ކޮމިޝަންގެ ސިޔާސީ ޕާޓީތަކުގެ ދަފްތަރުގައިވާ ގޮތުން މި މަހުގެ 19 ގެ ނިޔަލަށް ޕީއެންސީގައި ތިބީ 28،983 މެންބަރުންނެވެ. ޕީއެންސީއާ ގުޅިގެން މަސައްކަތް ކުރަމުންދާ ޕީޕީއެމްގެ މެންބަރުންގެ އަދަދު އުޅެނީ 34،698 ގަ އެވެ.