އައްޑޫ ސިޓީ އަށް ބޭނުން ވަނީ އާ ލިންކް ރޯޑެއް ކަމަށް މޭޔަރު އަލީ ނިޒާރު ސަރުކާރަށް ގޮވާލައިފި އެވެ.
ނިޒާރު ވިދާޅުވީ އައްޑޫގައި ހިންގަމުންދާ ޕްރޮޖެކްޓުތަކާއި ގުޅިގެން ބަރު އުޅަނދުތައް ލިންކް ރޯޑުގައި ދުއްވުމާ ގުޅިގެން އެ މަގު އެއްކޮށްހެން މިހާރު އޮތީ ހަލާކުވެފައި ކަމަށާއި ހިތަދޫ ބޮޑުމަގު ރީސާފޭސް ކުރުމުގެ ބަދަލުގައި މިވަގުތު ލިންކްރޯޑު މަރާމާތުކޮށްދޭން ކައުންސިލުން ކަމާބެހޭ ފަރާތްތަކުގެ ކިބަައިގައި އެދުނު ނަމަވެސް އެކަން ކާމިޔާބުވެފައި ނުވާ ކަމަށެވެ.
"އާ ލިންކް ރޯޑެއް ބޭނުން ވަނީ. ގަމުން ފެށިގެން ހިތަދޫއާ ހަމައަށް އާ މަގެއް ބޭނުންވަނީ. މިކަމަށް ބޭނުންވެފައި ރައްޔިތުން ތިބި ކަމާއި މިއަށް ވުރެ މުހިއްމު އެހެން ކަމެއް އައްޑޫ ސިޓީ އަށް ބޭނުން ނޫންކަން ތަކުރާރުކޮށް އެކިއެކި ޕްލެޓްފޯމުތަކުގައި ވާނީ ދައްކާފައި،" ނިޒާރު ވިދާޅުވި އެވެ.
ނިޒާރު ވިދާޅުވީ ލިންކް ރޯޑު މަރާމާތުކުރަން ކައުންސިލުން ވެސް މަސައްކަތްތަކެއް ކުރަމުންދާ ކަމަށާއި އެއީ އުނދަގޫ ގޮތަކަށް ކުރަމުންދާ މަސައްކަތެއް ކަމަށެވެ. މިއީ އަދި ފައިސާ ތިބުމަކުން ވާ ކަމެއް ނޫން ކަމަށާއި މިކަމަށް ބޭނުންވާ ވަސީލަތްތައް ވެސް ބޭނުންވާއިރު ލިންކްރޯޑުގައި ހެދިފައިވާ ވަޅުގަނޑުތަކަށް ތާރު އެޅުމަކީ އަދި ހައްލެއް ނޫން ކަމަށްވެސް އޭނާ ވިދާޅުވި އެވެ.
ސަރުކާރުން ވީހާވެސް އަވަހަކަށް ފަންޑު ހޯދައިގެން ނުވަތަ ދައުލަތުގެ ބަޖެޓުން ނަމަވެސް އައްޑޫ ލިންކްރޯޑު ހެދުމުގެ މަސައްކަތްކޮށްދިނުމަށް ގޮވާލާ ކަމަށާއި މިއަށް ވުރެ އިތުރު ހާއްސަ ކަމެއް އައްޑޫ އަށް މިވަގުތު ބޭނުން ނުވާ ކަމަށް ނިޒާރު ވިދާޅުވި އެވެ.
އެގޮތުން މި މަަސައްކަތް ވީ އެންމެ އަވަހަކަށް ފަށައިދިނުމަށް ސަރުކާރަށް ގޮވާލާ ކަމަށާއި ކައުންސިލުގައި ވެސް ވަސީލަތް ހުރި މިންވަރަކުން ލިންކް ރޯޑު މަރާމާތުކުރުން ކުރިއަށްގެންދާނެ ކަމަށް ވިދާޅުވި އެވެ.