އިޒްރޭލުން ލުބްނާނުގެ ދެކުނުގެ ސަރަހައްދުތަކަށް މިއަދު ދިން ވައިގެ ހަމަލާތަކުގައި 100 މީހަކު މަރުވެއްޖެ އެވެ.
ލުބްނާނުގެ ހެލްތު މިނިސްޓްރީން ބުނީ މިއަދު ހެނދުނު އިޒްރޭލުން ދިން ހަމަލާތަކުގައި 100 މީހަކު މަރުވުމުގެ އިތުރަށް 400 އަށް ވުރެ ގިނަ މީހުންނަށް އެކި ވަރުގެ އަނިޔާތައް ލިބިފައިވާ ކަމަށެވެ. މި ހަމަލާތަކުގައި މަރުވި މީހުންގެ ތެރޭގައި ކުޑަކުދިންނާއި އަންހެނުންގެ އިތުރުން ސިއްހީ ހިދުމަތުގައި އުޅޭ މީހުން ވެސް ހިމެނެ އެވެ.
އިޒްރޭލުން ބުނާގޮތުން ހަމަލާތައް އަމާޒުކުރީ ލުބްނާނުގެ ހިޒްބުﷲ ޖަމާއަތުން އުޅޭ ސަރަހައްދުތަކަށެވެ.
މި ހަމަލާތަކުގެ ރައްދުގައި ހިޒްބުﷲ އިން ވެސް މިއަދު ވަނީ އިޒްރޭލުގެ އުތުރާއި ދެކުނުގެ ބައެއް ސަރަހައްދުތަކަށް ވައިގެ ހަމަލާތަކެއް ފޮނުވާލާފަ އެވެ.
އިޒްރޭލާއި ހިޒްބުﷲ އިން ހަމަލާތައް ބަދަލުކުރަމުންދާއިރު، މިދިޔަ ހަފްތާގައި ހިޒްބުﷲ މެންބަރުންގެ ޕޭޖަރުތައް ގޮވުމުގެ ހާދިސާތަކެއް ވެސް ހިނގާފައިވެ އެވެ. ހިޒްބުﷲ އިން ވަނީ މިއީ އިޒްރޭލުން ދުރާލައި ރާވައިގެން ދީފައިވާ ހަމަލާއެއް ކަމަށް ތުހުމަތުކޮށްފަ އެވެ. މި ހަމަލާތަކުގައި 37 މީހަކު މަރުވެފައިވާއިރު، 287 މީހަކު ތިބީ ސީރިއަސް ހާލަތުގަ އެވެ.
މި ހަމަލާތަކާ ގުޅިގެން އިޒްރޭލަށް ހަރުކަށި އަދަބެއް ދޭނެ ކަމުގެ އިންޒާރު ހިޒްބުﷲ ޖަމާއަތުގެ ވެރިޔާ ހަސަން ނަސްރުﷲ ވަނީ ދެއްވާފަ އެވެ.